यात्रीवाहक बसमा बम विष्फोटन: कम्तिमा दसजना घाइते

इजरेलको आर्थिक राजधानी तेल अविवमा चल्ने एउटा यात्रीवाहक बसमा आज गराइएको बम विष्फोटनमा परी कम्तिमा दसजना घाइते भएका छन्। सैनिक मुख्यालय नजिकै गराईएको सो विष्फोटनपछि गाजामा भयानक विष्फोटनका आवाज सुनिएको कुरा बिबिसीले जनाएको छ। 

गाजामा आज बुधबार मात्रै एघारजना मानिस मारिएको जानकारी गाजाको स्वास्थ्य मन्त्रालयले दिएको छ।

यसैबीच, हमास र इजरेल बीच युद्ध बिराम गराउने प्रयास जारी छ। इजरेल र गाजा बीच युद्ध शुरु भएको आठ दिनपछि इजिप्टका राष्ट्रपतिसङ्ग बार्ता गर्नका लागि अमेरिकी विदेशमन्त्री हिलारी क्लिन्टन कायेरो पुग्नुभएको छ। 

यस अघि राष्ट्र संघका महासचिव बान की मूनले पश्चिमी किनारामा प्यालेस्टिनी प्राधिकरणका राष्ट्रपति मोहमद अब्बाससङ्ग वार्ता गरिसक्नुभएको छ।

अब आन्दोलनकै बलले कामचलाउ सरकार ढाल्ने रे

नेपाली कांग्रेस र नेकपा एमालेलगायतका विपक्षी दलहरुको गठबन्धनले सहमतिको प्रक्रिया अघि बढिरहेक बेला सरकारले एकलौटी ढंगले बजेट ल्याएकोमा त्यसको विरोध गर्दै अब सरकार विरोधी आन्दोलन चर्काउने निर्णय गरेको छ। कामचलाउ सरकारले प्रतिपक्षीहरुलाई छलेर बजेट ल्याएको अवस्थामा अब के गर्ने भन्नेबारे समीक्षा र रणनीति तय गर्न एमाले मुख्यालय बल्खुमा बसेको विपक्षी गठबन्धनको बैठकले आन्दोलनकै बलबाट सरकारलाई फाल्ने निष्कर्ष निकालेको छ । 

यस सन्दर्भमा प्रतिक्रिया ब्यक्त गर्दै केही राजनीतिक विश्लेषकहरुले बैठक र आन्दोलनमा समय खर्चिनु भन्दा खुरुक्क नयाँ प्रधानमन्त्रिका लागि उमेदवारको नाम लिएर राष्ट्रपति कार्यालय पुगेकोभए यो कामचलाउ सरकार आफै बाहिरिन्थ्यो भनेका छन।

सरकारले घोषणा गरेको नयाँ निर्बाचनको मिति पनि सरकारको आयु लम्ब्याउने रणनीति मात्रै भएको निष्कर्ष निकाल्दै विपक्षी गठबन्धनको बैठकले सरकारले ल्याएको बजेटलाई समर्थन नगर्ने निर्णय गरेको छ । गठबन्धनले अब वार्ताका लागि मात्र वार्तामा नबस्ने निर्णय पनि गरेको छ ।

नेपालको विकास र स्थिरता चीनको पनि चाहना: चिनियाँ राजदूत याङ

नेपालका लागि चिनियाँ राजदूत याङ होउलानले नेपालको विकास र स्थिरता चीनको पनि चाहना भएको कुरा बताउनुभएको छ। यस सन्दर्भमा नेपालको पूर्वाधार विकासका क्षेत्रमा लगानी गर्न चीन इच्छुक रहेको कुरा राजदूत यांगले बताउनुभयो। आफ्ना अन्य छिमेकी मुलुक, जस्तै जापान, कोरिया आदिको तुलनामा चीनको नेपालसँगको सम्बन्ध सारै सौहार्द्रपूर्ण भएकाले नेपालमा सीधै लगानी गर्न कुनै समस्या नभएको उहाँले बताउनुभयो ।

चीनमा हालै भएको नेतृत्व परिवर्तनबारे जानकारी दिन मङ्सिर पाँच गते काठमाडौंस्थित चिनियाँ दूतावासमा आयोजित पत्रकार भेटघाट कार्यक्रममा बोल्दै चिनियाँ राजदूत यांगले नेपालका जल-विद्युत्, पर्यटनलगायतका क्षेत्रमा लगानी गर्न चीनका धेरै कम्पनीहरु इच्छुक रहेको र  त्यसका लागि लगानी मैत्री वातावरणको मात्र खाँचो रहेको कुरा बताउनुभयो ।

चीनको आर्थिक विकासबाट नेपालले प्रसस्त फाइदा लिनसक्ने सम्भावना रहेको कुरा बताउंदै राजदूत यांगले चीनले सदैव नेपालको हित चाहेको र आगामी दिनमा चीनको नयाँ नेतृत्वले पनि त्यस्तो कामना गरिराख्ने कुरा स्पष्ट पार्नुभयो । 

'हाम्रा छिमेकीसँगको मित्रता र साझेदारीलाई हामी निरन्तररुपमा प्रवर्द्धन गर्दैजानेछौं, आपसी हितयुक्त सहकार्यलाई बढाउँदैजानेछौं र चीनको विकासबाट हाम्रा छिमेकीको फाइदालाई सुनिश्चित पार्नेछौं', चीनमा नेतृत्व परिवर्तन हुनुअघि निवर्तमान राष्ट्रपति हु चिन्थाओले तयार पार्नुभाएको दस्तावेजको अंश पढ्दै राजदूत यांगले भन्नुभयो। 

चीन समाजवादी विकासको बाटोमा लागिरहेको भए पनि खुला र निष्पक्ष व्यापार चीनको विशेषता भएकाले यसबाट नेपाल पनि लाभान्वित हुनसक्ने विश्वास नेपालका लागि चिनियाँ राजदूत यांगले व्यक्त गर्नुभयो। 

राष्ट्र संघका महासचिव बान की मूनद्वारा प्यालेस्टिनी रकेट आक्रमणको निन्दा

प्यालेस्टिनी विद्रोही समूह र इजरेल बीच युद्ध विराम गराउने प्रयासस्वरूप इजिप्टको कायेरोमा भैरहेको वार्ता स्थलबाट इजरेलको राजधानी पुग्नुभएका राष्ट्र संघका महासचिव बान की मूनले इजरेलका प्रधानमन्त्री नेत्न्याहुसँग संयुक्त पत्रकार सम्मेलनको आयोजना गर्नुभयो। सो अबसरमा उहाँले प्यालेस्टिनी विद्रोही पक्षबाट भएको रकेट आक्रमणको निन्दा गर्नुभयो। तर उहाँले इजरेलको भने आलोचना पनि गर्नुभएन। उहाँले इजरेलसँग सम्भव भएसम्मको 'संयम अपनाउन' आग्रह मात्र गर्नुभयो। 

विश्वका सम्पन्न पूजीबादी राष्ट्रहरुको समर्थन र सहयोग पाएर मैमत्त भएको इजरेलले तीनजना इजरेली नागरिक मारिएको प्रतिकारमा निहत्था र निर्दोष तीन सयभन्दा बढी प्यालेस्टिनी मार्दा पनि उसको निन्दा गर्न नपर्ने, बरु उल्टै प्यालेस्टाइनी पक्षकै निन्दा गर्नुपर्ने यो बाध्यता कस्तो? आफ्नो जागिर जोगाउनका लागि मुटुमाथि ढुंगा राखेर भए पनि सत्यबाट दृष्टि घुमाउनैपर्ने, अन्तै। योभन्दा ठूलो दुर्भाग्य अरु के हुनसक्छ! 

  

इजिप्टमा शान्ति वार्ता चलिरहेको छ। यहाँ इजरेलले प्यालेस्टिनीहरुको निद र भोक दुवै हराम गरिराख्याछ। त्यसै पनि झुकिरहेको निहत्था कमजोरलाई अझ झुकाएर वार्तालाई आफ्नो पक्षमा पार्ने प्रयास गर्नु बुद्धिमत्तापूर्ण निर्णय नै हो।