आफ्नोपनलाई बिर्सेर अर्काको संस्कृति अँगल्दा देखापर्ने स्थिति बिसङ्गति हो, र यसै बिसङ्गतिको प्रतिफल हो– रामपुर कृषि क्याम्पसमा गत राति भएको तोडफोड ।
पराजित मानसिकताले ग्रस्त हामी नेपालीहरुमा विश्वका धनि भनाउँदा देशहरुमा मनाइने हरेक चाड-पर्वहरु मनाउँदा आफू ठूलो भइन्छ भन्ने विश्वास छ, शायद। त्यसैले हामी, विशेषगरी हाम्रो अहिलेको तथाकथित युवा पुस्ता, ग्रिगोरियन पात्रो अनुसारको नयाँ वर्ष मनाउँदा आफूलाई गौरवान्वित भएको ठान्दछौं।
ग्रिगोरियन पात्रोअनुसार चल्ने यूरोप र अमेरिका मात्र होइन,हाम्रै छिमेकी भारतमा समेत नेपालको नयाँ वर्ष यिनीहरुको पात्रोको महिना- अप्रिल पन्ध्र तारिखतिर पर्छ भन्ने कुराको समेत जानकारी हुँदैन, अर्को छिमेकी चीनमा त, त्यहाँका मानिसहरु नेपाल भन्ने देश पनि छ र? नेपाल कहाँ पर्छ भनेर सोध्छन भन्ने कुरा पढ्ने बेलामा नपढ्ने, कक्षामै नजाने, अनि जाँचमा प्रश्नपत्र अप्ठ्यारो लाग्यो भने (नपढेपछि अप्ठ्यारो त लाग्छ नै) नपढ़ाएकोबाट प्रश्न दिइयो भनेर हड्तालमा उत्रने अहिलेको विचरा युवा पुस्तालाई के थाहा!
इटालीका अधिकांश मात्र नभई, नब्बे प्रतिशत भन्दा बढी मानिसलाई विश्वमा नेपाल नामको देश पनि छ भन्ने कुरा थाहै हुँदैन, (नेपालको कुनै चाड मनाउने कुरा त कल्पनाको कुरा भयो), तर हामी त्यहाँको कुनै सामन्तबादी सोचको परिणाम भ्यालेन्टाइन दिवस मनाएर आफूलाई एकदम चेतनशील र आधुनिक ठानिरहेका हुन्छौं।
यस्तो पराजित मानसिकताको विजारोपण गर्ने नेपाली शिक्षाका व्यापारीहरु र यस्तो व्यापारलाई खुलेआम फष्टाउन दिएर सरकारी स्तरका विद्यालयहरुलाई अनुदान नै नदिएर बन्द हुन वाध्य पार्ने भ्रष्ट राजनीतिले प्रश्रय पाउञ्जेल यस्ता तोडफोडका घटनाहरु हुँदैजानेछन, बढ्दैजानेछन।
No comments:
Post a Comment