राजनीतिक दलहरुले समग्रमा सहमति कायम गरी वर्तमान राजनीतिक गतिरोधलाई निकास दिनैपर्ने: प्रधानमन्त्री

प्रधानमन्त्री डा बाबुराम भट्टराईले  दलहरुबीच राष्ट्रिय सहमति कायम गरी संविधान सभाको नयाँ निर्वाचनमा लाग्नु सबैभन्दा उत्तम विकल्प भएको कुरा बताउनुभएको छ। अठारौं महानगर दिवसका अवसरमा आज शुक्रबार काठमाडौँमा आयोजित कार्यक्रममा प्रधानमन्त्री भट्टराईले विद्यमान संवैधानिक एवम् कानूनी समस्याहरुको समाधान सम्बन्धमा राजनीतिक दलहरुले समग्रमा सहमति कायम गरेर वर्तमान राजनीतिक गतिरोधलाई निकास दिनैपर्ने कुरा बताउंदै प्रधानमन्त्रीले यसका लागि प्रधानमन्त्रीको हैसियतले त्याग गर्न  आफू तयार रहेको बताउनुभयो।                                                                                  
नयाँ निर्वाचनवाट मात्रै मुलुकमा विद्यमान लम्विदो संक्रमणकालको अन्त्य गरी राजनैतिक गतिरोधलाई निकास दिनसकिने र मुलुकलाई आर्थिक-सामाजिक समृद्धिको नयाँ मार्गमा डोर्‍याउन सकिने कुरा बताउंदै प्रधानमन्त्री भट्टराईले आगामी वैशाखमा गर्नेगरी सरकारले घोषणा गरेको निर्वाचनको तयारीमा जुट्न सबैलाई आह्वान गर्नुभयो।

स्थानीय निकायमा जन-प्रतिनिधिहरु नभएका कारण ती निकायमा जनताको प्रत्यक्ष नियन्त्रण र निगरानी कमजोर बन्नपुगेको, र यसै कारण पछिल्लो समयमा कतिपय स्थानीय निकायमा चरम आर्थिक अनियमितता देखापरेको स्मरण गराउंदै उहाँले यस्ता आर्थिक उच्छृंखलता र भ्रष्टाचारजन्य कार्यलाई सरकारले गम्भीरतापूर्वक लिएको बताउनुभयो। यस्ता क्रियाकलापमा संलग्न कर्मचारी तथा अन्य जो कोहीलाई पनि कानुन वमोजिम कारवाहीको दायरामा ल्याउन नेपाल सरकारले कुनै कसर वाँकी नराख्ने प्रतिबद्धता पनि प्रधानमन्त्री भट्टराईले व्यक्त गर्नुभयो। 
फोटो सौजन्य: इकान्तिपुर