११ को बढुवा

काठमाडौं, कार्तिक २ - मन्त्रिपरिषद् बैठकले ११ सचिवको बढुवा गरेको छ ।

मन्त्रिपरिषद्को बिहीबार साँझ बसेको बैठकले ११ सहसचिवलाई सचिवमा बढुवा गर्ने निर्णय गरेको हो । नारायणगोपाल मलगो, आत्माराम पाण्डे, रणबहादुर श्रेष्ठ, उद्धब बास्कोटा, जनार्दन नेपाल, लक्ष्मणकुमार पोखरेल, शान्तबहादुर श्रेष्ठ, शारदाप्रसाद त्रिताल र शान्तराज सुवेदी, सुमनकुमार शर्मा र नरेन्द्र दाहाल पनि सचिवमा बढुवा भएका छन् ।

बैठकले नेपाल टेलिभिजनको महाप्रबन्धकमा लक्ष्मण हुमागाईंलाई नियुक्त गर्ने निर्णय गरेको छ । दीपक रौनियार जलविद्युत् विकास तथा लगानी कम्पनीमा महाप्रबन्धकमा नियुक्त भएका छन् । दुवै खुला प्रतिस्पर्धाबाट छानिएका हुन् ।

सचिव हेरफेर पनि

मन्त्रिपरिषद् बैठकले अर्थसचिव कृष्णहरि बाँस्कोटालाई प्रधानमन्त्री तथा मन्त्रिपरिषद् कार्यालयमा सरुवा गरेको छ । अर्थसचिवमा बिहीबार नै बढुवा भएका शान्तराज सुवेदीलाई लगिएको छ ।

कृषि सचिव गणेशराज जोसीलाई अख्तियार दुरुपयोग अनुसन्धान आयोगमा लगिएको छ भने कृषिमा जयमुकुन्द खनाललाई ल्याइएको छ । शान्ति मन्त्रालयका सचिव ध्रुवराज शर्मालाई राष्ट्रपति कार्यालयमा लगिएको छ भने युवा तथा खेलकुद मन्त्रालयका सचिव सुशील घिमिरेलाई शान्ति मन्त्रालय लगिएको छ ।

यसैगरी महिला बालबालिका तथा समाजकल्याण मन्त्रालयमा दिनशहरि अधिकारी, वातावरणमा केशव भट्टराई, सहरी विकास तथा गरिवी निवारण मन्त्रालयमा रणबहादुर श्रेष्ठ, भूमिसुधारमा शान्तबहादुर श्रेष्ठ, महालेखामा नरेन्द्र दाहाल, उपराष्ट्रपति कार्यालयमा लक्ष्मण पोखरेल, खेलकुद मन्त्रालयमा हरि नेपाल र प्रधानमन्त्री कार्यालयमा नारायणगोपाल मलेगोको सरुवा तथा पदस्थापना गरिएको छ ।

यसैगरी मन्त्रिपरिषद् बैठकले केही प्रहरी अधिकारीको सरुवा गरेको छ ।