चीनमा खासगरी छोरीको बिहेले निकै महत्त्व राख्छ । जीवनको यो क्षणलाई स्मरणीय बनाउन त्यहाँ हरसम्भव प्रयास गरिन्छ । बिहेमा बेहुलीलाई सुनका गरगहना पहिराउनुलाई अचम्म मानिन्न ।
हालै दक्षिणी चीनको फुजेन प्रान्तस्थित क्वानझोउकी २६ वर्षे लियु चेङले वैवाहिक समारोहमा पाँच किलो सुनका गहना लगाइन् । उक्त प्रान्तभरि यसको चर्चा छ । छोरीलाई दिइने सुनको परिमाणको सम्बन्ध उसको सौभाग्यसँग गाँसिने छोरी पक्षको मान्यता छ ।
बेहुलीकी आमाले आफू र नातेदारहरूले धेरै वर्ष अघिदेखि सुन संकलन गर्न थालेपछि यो शुभदिन आएको बताएकी छन् । राम्रो परिवारका ज्वाइँ भएकाले यति सुन दिनु जरुरी भएको उनले बताइन् । लियुको हातमा नअटेपछि बालाको हार बनाएर आमाले पहिराएकी थिइन् । गहनाको भारले हेयु निकै विस्तारै हिँडिरहेकी थिइन् । दाइझोको रूपमा दिइएको गहनामा ब्रासलेट, हार, औंठी र बहुमूल्य रत्नहरू थिए ।
आमा लिन हुलाई छोरीलाई गहना लाइदिन एक घन्टाभन्दा बढी समय लागेको थियो ।
