एमाओवादी अध्यक्ष पुष्पकमल दाहाललाई भेट्न कांग्रेस सभापति शुशिल कोइराला लाजिम्पाटमा

नेपाली राजनीतिको इतिहासमा नयाँ घटना आज भयो- एमाओवादी अध्यक्ष पुष्पकमल दाहाललाई भेट्न कांग्रेस सभापति शुशिल कोइराला पुग्नुभयो। यसअघि आजसम्म नेपाली कांग्रेसको कुनै पनि सभापति माओबादी नेताहरुलाई भेट्न गएन। देशका प्रधानमन्त्री पुष्पकमल दाहाल, बाबुराम भट्टराई समेत बुढा नेताहरुको सम्मान गर्दै उनीहरुकै निवासमा भेट्न पुग्थे। 

कोइरालालाई के कुराले दाहाल निवास पुग्न लगायो त?  लोभले कि देशको समस्याको चिन्ताले? देशको चिन्ता त यी कसैलाई पनि छैन भन्ने कुरा जगजाहेर भैसकेको छ। देश भड्खालोमा पुग्नलागिसक्दा पनि समस्याको समाधानतिर लाग्नुको साटो तँ कुर्ची छोड म बस्छु भन्न लाज नमन्नेहरुमा बुद्धी पलायोहोला भनेर सोच्नु त मुर्खता मात्रै हुन्छा। उहाँलाई देशको प्रधानमन्त्री हुन पाइहाल्छु कि भन्ने  लालचले नै दाहालको ढोका ढकढकाउन मन लागेको हुनुपर्छ। 

जे होस्, कम्तिमा भेट त भयो। यसले पनि सकारात्मक पक्षको शुरुवात गराउन सक्छ। उहाँहरुले भेटमा केही गर्न नसके पनि सधै झैं दुई पार्टीबीच समझदारी गरी अघि बढ्ने सहमति भएछ । यस सहमतिमा सत्ताकै गन्ध आउँछ। अरु केही होइन।

सम्पूर्ण जल्दाबल्दा विषयमा समग्रमा सहमति गरे काग्रेसलाई प्रधानमन्त्री दिनसकिने भन्दैआएको माओवादीले अन्य कुनै पनि विषयमा सहमति नै नगरिकन प्रधानमन्त्रीको उम्मेदवारी दिनपुग्नुभएका कोइरालालाई स्वीकार नगरेपछि माओवादीले धोखा दियो भन्नेहरु माओवादीलाई विनासर्त कुर्चीबाट झार्न बाहेक अरु कुनै कारणले माओवादीको ढोकामा उभिन पुग्नसक्दैनन। सधै माओवादीलाई नै थांगनामा सुताउन पल्केकाहरु ममता दर्शाएको जस्तो गरेर फेरि लाभ हासिल गर्नसक्छन। यस कुरामा माओवादी सजग हुनैपर्छ। 

तथापि,  एमाओवादी अध्यक्षलाई महामन्त्री सिटौलालेले भेटेपछि दाहाललाई भेट्न पुगेका कोइरालाको सक्रियतालाई महत्वपूर्ण मान्नै पर्छ, यदि यो देश र जनताका लागि हितकर भयो भने। अन्यथा, यो सक्रियता कुर्चीमै सिमित भयो भने यो पक्कै लाजमर्दो कुरा हुनेछ।
तस्विर सौजन्य: इकान्तिपुर

चाइना डेलीद्वारा अफ्रीका संस्करण शुरु:चीन र अफ्रिकी महादेश बीचको सम्बन्ध सुधार गर्नु मुख्य उद्देश्य

चीनको सबैभन्दा ठूलो अंग्रेजी भाषाको दैनिक पत्रिका चाइना डेलीले अफ्रीका संस्करण शुरु गरेको छ। डिजिटल रुपमा पनि आउने यस साप्ताहिकले अफ्रीका संस्करण शुरु गर्नुको उद्देश्य चीन र अफ्रिकी महादेश बीचको सम्बन्धका बारेमा ब्याख्या गर्नु रहेको जानकारी त्यसका प्रकाश एबम् सम्पादक चू लिङ्गले दिएकाछन। 

चीन र अफ्रिकी मदेश बिचको सम्बन्ध अहिलेको विश्वमा सबैभन्दा महत्वपूर्ण रहेको कुरा सम्पादक चूले बताउनुभएको छ।

चाइना डेली अफ्रिकी संस्करण केन्याको राजधानी नैरोबीबाट प्रकाशित हुनेछ। चीनको केन्द्रीय टेलिविजन- सिसिटिभी र सिन्ह्वा समाचार संस्थाले अफ्रीका क्षेत्रमा आफ्नो गतिबिधि शुरु गरिसकेका छन। 

टेली-संचार र निर्माणका क्षेत्रमा लगानीलगायत अफ्रिकामा चीनको आर्थिक भूमिका बढ्दो छ। केन्याका संचार मन्त्री सामुएल पोघिसिओले चीन र अफ्रीका बीच झन् राम्रो सम्बन्ध र समझदारीका लागि यस साप्ताहिकले अरु राम्रो मंच प्रदान गर्ने कुरा बताउनुभएको जानकारी स्थानीय संचार माध्यमहरुले दिएका छन्। 

तस्विर सौजन्य:चाइना डेली

चीनद्वारा पूर्वी चिनियाँ समुद्रको विवादित क्षेत्रमाथि आफ्नो दाबी पुष्टि गर्ने विस्तृत विवरण राष्ट्र संघसमक्ष प्रस्तुत

चीनले पूर्वी चिनियाँ समुद्रको विवादित क्षेत्रमाथि आफ्नो दाबी पुष्टि गर्ने विस्तृत विवरण राष्ट्र संघसमक्ष प्रस्तुत गरेको छ। त्यस विवरणमा चीनले निश्चित भौगोलिक अवस्थितिले चीनको सीमा-क्षेत्र जापान नजिकै रहेका द्वीपहरुको समूहसम्म फैलिएको पुष्टि गर्ने तर्क प्रस्तुत गरेको छ। 

भूगर्भशास्त्रीहरुको राष्ट्र संघीय आयोगले चीनको दाबीको अध्ययन गर्ने तर विवादित क्षेत्रको स्वामित्वका बारेमा निर्णय गर्नसक्ने अधिकार भने त्यससङ्ग नभएको बताइएको छ। चीनमा त्याओयु र जापानमा सेंकाकु भनिने त्यस द्वीप समूहमाथि चीन र जापान दुबैले धेरै अघिदेखि दाबी गर्दैआएक छन। 

त्यस द्वीप समूहका तीनवटा टापू तीनका जापानी उपयोगकर्ताबाट गत सेप्टेम्बर महिनामा जापान सरकारले किनेपछि तनाव फेरि बढेको छ, जसका कारण चीनका कयौं शहरहरुमा सार्वजनिक प्रदर्शनहरु गरिएकाछन। 

त्यति बेलादेखि चिनियाँ पानी जहाजहरु त्यस द्वीप समूह वरपरबाट ओहरदोहर गर्ने गरिरहेकछन जसका कारण जापान आक्रोशित भैरहेको छ। चिनियाँ सरकारी हवाईजहाज त्यस द्वीप समूह नजिकैबाट उडेपाछि गत बिहिबारदेखि ति दुइ देशबीच फेरि अर्को दोहरी शुरु भएको छ। प्रतिरोधमा जापानले त्यहाँ लडाकु विमान पठायो। र दुबैले एक-अर्कामाथि एक-अर्काको हवाई सीमाको उल्लङ्घन गरेको आरोप लगाए। 

राष्ट्र संघमा प्रस्तुत गरेको दाबी-विवरणमा चीनले 'आकृतिनिरुपण र भौगोलिक लक्षणले पूर्वी चिनियाँ समुद्रमा रहेका ती द्वीपहरुको प्राकृतिक  विस्तार चिनियाँ भू-सिमानासङ्ग निकट रहेको स्पष्ट पार्दछ' भनिएको छ।
तस्विर सौजन्य: बिबिसी/एएफपी  

अमेरिकाको स्यान्डी हुक इलिमेन्टरी स्कुलमा जथाभावी गोली प्रहार: बीसजना केटा-केटीसहित सत्ताइसजनाको मृत्यु

अमेरिकाको कनेक्टिकट राज्यको न्युटाउनमा संचालित स्यान्डी हुक इलिमेन्टरी स्कुलमा एक युवकले जथाभावी गोली चलाउँदा बीसजना केटा-केटीसहित सत्ताइसजनाको ज्यान गएको छ। 

दुइवटा अर्ध-स्वचालित पेस्तोलले छब्बीसजनाको ज्यान लिएपछि एडम लेन्ज नामका बीस वर्षीय ती युवकले आफैलाई गोली हानेका थिए। दुइवटा कक्षामा गएर उनले अन्दाधुन्ध गोली चलाएको जानकारी प्रहरीले दिएको बिबिसीले जनाएको छ। 

गोली चलाउने एडमकी आमा, त्यसै विद्यालयकी शिक्षिका नान्सी लानजालाई  गोली हानेर उ विद्यालयतिर लागेको हुनसक्ने अनुमान प्रहरीले गरेको छ। 

अमेरिकी राष्ट्रपति वाराक ओवामाले आँसु चुहाउँदै यस हत्याकाण्डले आफूलाई विक्षिप्त पारेको प्रतिक्रिया दिनुभएको छ। 

अमेरिकामा भएको यस प्रकारको यो दोस्रो ठूलो हत्याकाण्ड हो। सन् २००७ मा भर्जिनियामा यस्तै हत्याकाण्डमा परी ३३ जनाले ज्यान गुमाएका थिए। 

तस्विर सौजन्य: बिबिसी 

बाल-विवाह गराएको आरोपमा प्रहरीद्वारा बेहुला-बेहुलीसहित छजनालाई पक्राउ

पाँचथर जिल्लाको सदरमुकाम  फिदिममा उमेर नपुगेका केटा-केटीको विवाह गराएको आरोपमा प्रहरीले जग्गेबाटै बेहुला-बेहुली, बेहुलाका बाबु सहित ६ जनालाई पक्राउ गरेको छ । पक्राउ पर्नेमा १७ वर्षीय बेहुला राजन धमला, १७ वर्षीया बेहुली सुमित्रा घिमिरे, बेहुलाकी दिदी रिता धमला, बाबु धनकुमार धमला, हजुर बुबा अमृतमान धमला र पुरोहित कृष्ण गदाल रहेका हुन् । 

१८ वर्षमुनिका केटा-केटीको विवाह गरे-गराए बाल-विवाह मानिने कानुन अन्तर्गत उनीहरु विरुद्ध मुद्दा चलाइने प्रहरी निरीक्षक गोपाल ढकालले बताउनुभयो। अदालतबाट अभियोग प्रमाणित भएमा उनीहरुलाई जनही १० हजार रुपैंयाँ जरिवाना वा ६ महिना कैद वा दुवै सजाय हुनसक्ने व्यवस्था कानूनमा छ ।

बेहुला-बेहुलीले उमेर नपुगेको भनिए पनि आफूहरुले राजीखुसीसाथ अन्तर्जातीय विवाह गरेको बताएका छन् । सुमित्रा यसअघि मंसिर ८ गते नै भागेर बेहुलाको घरमा बसिरहेकिथिइन। उनीहरुको सहबासलाई वैधानिक रूप् दिनका लागि शुक्रबार विवाह गर्नलागेपछि जिल्ला बाल क्लव सञ्जालका पूर्व अध्यक्ष तथा सल्लाहकार सुन्दर लावतीको जाहेरीको आधारमा प्रहरीले उनीहरुलाई पक्राउ गरेको हो ।

तीन साताअघि नै भागी विवाह गरेपछि केटा-केटी पक्षबीच असमझदारी बढेको थियो। केटी पक्षले दुई वर्ष छुट्याउने सर्त राखे पनि केटा-केटीले  नमानेपछि यसै मंसिर १५गतेदेखि एकैसाथ बस्दैआएका थिए । केटीले केटा छोड्नु परे झुण्डिन्छु भनेपछि सँगै बस्न अनुमति दिइएको जानकारी दिदै बेहुलाका बाबु धनकुमारले विवाहलाई वैधानिकता दिनखोज्दा झन्झटमा परिएको बताउनुभयो।

केटा-केटीले सँगै बस्न चाहे पनि केटीका काका पर्ने गोपाल घिमिरेसहितले केटा पक्षलाई छुट्याउन दबाब दिंदैआएको केटी पक्षले बताए । दलित जातीय मुक्ति समाजका अध्यक्ष लक्ष्मी सुनारले 'उनले केटा-केटीलाई अलग नगरे राम्रो नहुने धम्की पटक-पटक दिएकाछन्' भन्नुभयो। ब्राम्हण र दलितबीच भएको अन्तर्जातीय विवाहलाई प्रोत्साहित गर्नुपर्नेमा यसलाई उल्टै अमान्य गराउन प्रहरी लागेको गुनासो पनि उहाँले गर्नुभयो। उमेर नपुगे पनि केटा-केटी राजीखुशीले सँगै बसेको अवस्थामा यसो गर्नु नहुने धारणा सुनारको छ।  चित्रमा-पक्राउ गरी ल्याइएका बेहुला राजन धमला र बेहुली सुमित्रा घिमिरे प्रहरी कार्यालयमा ।

तस्विर सौजन्य: इकान्तिपुर