नेपाली कांग्रेसका वरिष्ठ नेता शेरबहादुर देउवाले संविधानका सबै अन्तर्वस्तुमा अहिले सहमति बन्नसक्ने सम्भावना नरहेकोले निर्वाचनमा जानुको विकल्प नभएको बताउनुभएको छ। बुढानिलकण्ठस्थित निजी निवासमा पत्रकारहरुसङ्ग कुरा गर्दै नेता देउवाले संविधानको आधारभूत सिद्धान्त, संघीयता र गणतन्त्रलाई स्वीकार गरेर निर्वाचनमा जानुपर्ने कुरा स्पष्ट पर्नुभयो।
एकीकृत नेकपा माओवादीले भनेजस्तो शासकीय स्वरुपमा भने अहिले सहमति हुनैनसक्ने कुरा देउवाले स्पष्ट पार्नुभयो।
कांग्रेसलाई धोका नहुने हो भने एमाओवादीले अघि सारेको शर्त मान्दा पनि फरक नपर्ने बताउँदै देउवाले सधैँ अविश्वास गरेर मात्रै पनि हुँदैन भन्नुभयो।
एकीकृत नेकपा माओवादीका अध्यक्ष पुष्पकमल दाहालले राष्ट्रपतिले दिएको समयभित्रै सहमति बन्छ भनेको कुरामा समेत आशंका र अविश्वास गर्ननहुने विचार व्यक्त गर्दै देउवाले 'सहमति गर्ने हो भने शंका मात्रै गरेर हुँदैन' भन्नुभयो।
तस्विर सौजन्य: इकान्तिपुर
