उसु खेलाडीलाई मकाउबाट ३ लाख ४३ हजार रुपैयाँ पुरस्कार

हङकङ, आश्विन २१ - मकाउमा आयोजित चौथो वर्ल्ड जुनिएर उसु च्याम्पिएनसिपमा सहभागी खेलाडी तथा प्रशिक्षकलाई त्यहाँ कार्यरत नेपालीहरूले प्रोत्साहन पुरस्कार स्वरुप ३ लाख ४३ हजार रुपैयाँ उपलब्ध गराएका छन् ।

प्रतियोगितामा सहभागी तीन खेलाडीमध्ये १८ वर्षीय चाहना बोम्जन लामाले साठी किलोग्राम तौल समुहको सान्डातर्फ कांस्य पदक जितेकी थिइन । ४२ राष्ट्र सम्मिलित खेलमा नेपालको प्रतिनिधित्व गर्दै विजेता लामासँगै रिंजी शेर्पा, विशाल थापा सिंजाली र प्रशिक्षक युवराज गुरुङ सहभागी थिए । टोलीका चारमध्ये कांस्य विजेता लामालाई कुल पुरस्कार रकमको आधा र बाँकी अन्य दुई खेलाडी तथा प्रशिक्षकलाई दामासाहीले प्रदान गरिएको हो ।

'प्रवासमा बस्ने नेपालीहरूले देखाउनु भएको सहयोग, सद्भाव र मायाले निकै उत्साहित बनाएको छ', गैर आवासीय नेपाली संघ मकाउको सकृयतामा उक्त पुरस्कार रकम  प्राप्त भएको उल्लेख गर्दै प्रशिक्षक गुरुङले भने, 'राज्यबाट उपेक्षित भइरहेका बेला यस्ता सहयोगले खेलाडीहरूलाई राम्रो खेल्न प्रोत्साहित गर्नेछ ।' विश्व जुनियर उसुमा नेपाली खेलाडीले पाएको अहिलेसम्मकै ठूलो उपलब्धि बताउँदै प्रशिक्षक गुरुङले राज्यका तर्फबाट समेत सहयोग हुने अपेक्षा गरेको जनाए ।

नेपाली खेलाडीहरू आर्थिक रुपमा पछि परेको बताउँदै एनआरएन मकाउका अध्यक्ष सुर्दशन थापामगरले खेलाडीहरूको मनोबल बढाउन प्रोत्साहन स्वरुप नगद पुरस्कार उपलब्ध गराएको बताए । 'सबै ठाउँबाट यस्तै सहयोग हुनसके खेलाडीहरूलाई हौंसला बढाउन मद्दत मिल्नेछ', उनले थपे । प्रशिक्षक युवराजले मुलुक बाहिर रहेकाहरूबाट खेलाडीलाई प्राप्त भएको यो रकम अहिलेसम्मकै ठूलो हुनसक्ने बताए ।

'प्रवासमा बस्ने नेपालीले खेलाडीलाई पुरस्कार स्वरुप यति ठूलो रकम उपलब्ध गराएको थाहा छैन्', उनले भने, 'उहाँहरूले दिनुभएको सम्मान र इज्जतले निकै हौसला मिलेको छ ।' कांस्य विजेता लामाको प्रतियोगिताका दौंरान बायाँ पाखुराको हड्डी भाँचिएको थियो । थप उपचारका लागि पुरस्कार रकमले सहयोग पुग्ने समेत प्रशिक्षक गुरुङले बताए ।

नेपाललाई १ सय ३२ रनको लक्ष्य

काठमाडौ, आश्विन २१ - नेपालले एसीसी ट्रफि एलिटको तेस्रो खेलमा जितको लागि १ सय ३२ रनको लक्ष्य पाएको छ ।

 यूएईमा भइरहेको प्रतियोगितामा नेपालविरूद्ध पहिले ब्याटिङ गरेको साउदी अरेबिया ४८ ओभर १ बलमा १ सय ३१ रनमा समेटियो । कुवेतविरुद्ध फिलतो बलिङ गरेका नेपाली बलर साउदी अरेबियाविरुद्ध चम्के । कप्तान पारस खड्का र बसन्त रेग्मीले समान ३-३ विकेट लिए । शक्ति गौचन र भुवन कार्कीको नाममा २-२ विकेट रह्यो । साउदी अरेबियाविरुद्धको खेलमा विनोद भण्डारीले डेब्यु गरेका छन् । स्पिनर संजम रेग्मीलाई घटाउँदै विनोदलाई टिममा सामेल गरिएको हो । नेपालले प्रतियोगिताको पहिलो खेलमा यूएईलाई ४ विकेट हराएको थियो । दोस्रो खेलमा कुवेतसग ४ विकेटले पराजित भयो ।

जहाजबाट बरामद भयो सवा करोड

काठमाडौं, आश्विन २१ - त्रिभुवन अन्तर्राष्ट्रिय विमानस्थलमा ५ तहको सुरक्षा जाँच छल्दै शुक्रबार भारतीय नागरिक विनोदकुमार सोनीले जहाज भित्रै अवैध रूपमा १ करोड २४ लाख रुपैयाँ बराबरका विभिन्न विदेशी मुद्रा पुर्‍याएका छन् । सुरक्षा निकाय र विमानस्थल कर्मचारीको मिलेमतोमा उनले यस्तो गरेको आशंका छ । काठमाडौंबाट दुबई जान लागेका भारत राजस्थानका ३५ वर्षीय सोनीले कसका लागि रकम लैजान लागेका हुन् भन्ने सुरक्षा निकायले खुलाएको छैन । यति धेरै विदेशी मुद्रा निर्बाध विमानभित्र पुग्नुले विमानस्थलको सुरक्षा व्यवस्थामा लापरबाही प्रस्ट्याएको छ । साउदी अरब जाने जहाज 'उड्नेबित्तिकै खस्ने' सूचना आफूलाई रमेश मिलन केसी भन्दै कसैले दिएपछि उड्न लागेका ६ जहाज जाँच गरिएका थिए । सोही क्रममा फ्लाइट दुबईको उडानबाट दुबई जान लागेका काठमाडौं, कुलेश्वर निवासी सोनीलाई अवैध मुद्रासहित राति १० बजे प्रहरीले पक्राउ गरेको हो । उनलाई महानगरीय प्रहरी परिसर हनुमानढोकामा राखिएको छ ।

विमानस्थलका महाप्रबन्धक रतिश सुमनका अनुसार विमानमा विस्फोट हुने गलत सूचना ७ बजेर ३५ मिनेटमा आएको थियो । त्यसपछि सबै यात्रुको सामान र जीउ खानतलासी लिने क्रममा विदेशी मुद्रा बरामद भएको थियो । 'विमानमा बम राखेको हल्ला आयो । सबै यात्रु र विमान खानतलासी लिन थालेपछि पछिल्लो सिटमा बसेका एक यात्रु शौचालय गए, शंका लागेर शौचालयमा हेर्दा पैसाको पोका भेटियो,' खानतलासीमा संलग्न एक प्रहरीले भने, 'सुरक्षा जाँचका क्रममा कसरी पास भयो शंकास्पद छ । मिलेमतोमा पठाएको हुन सक्छ ।' विमानस्थल प्रहरी स्रोतका अनुसार सोनीको साथबाट कतारी मुद्रा ६८ हजार १ सय ५०, साउदी रियाल १ लाख ७३ हजार १ सय १०, यूएई दिनार १६ हजार ९ सय, ओमनको मुद्रा ५ सय २९, बहराइनको मुद्रा ४ सय ५, युरो ४१ हजार ७ सय ५०, स्विस प|mांक ८ हजार ५ सय ४०, बेलायती पाउन्ड ४ हजार ९ सय १० र कुवेती रियाल १ हजार ७ सय ८७ रुपैयाँ बरामद भएको छ ।

यति धेरै विदेशी मुद्रा जहाजभित्रैबाट बरामद गरिएको घटनाले प्रहरीमा खैलाबैला मच्चिएको छ । विमानस्थल प्रमुख प्रहरी नायब महानिरीक्षक -डीआईजी) नारायण बस्ताकोटीले शनिबार राति अबेरसम्म आफ्नो मोबाइल अफ गरे । जहाज चढ्नुअघि पाँच ठाउँमा सुरक्षा जाँच हुन्छ । सुरक्षाकर्मीले पेटी, जुत्ता, घडी, पर्ससमेत खोल्न लगाएर चेकजाँच गर्ने गर्छन् । हाते ब्यागलाई समेत एक्सरे जाँच गरेर पठाउने गरिएको छ । विमानस्थलका सुरक्षामा खटिएका वरिष्ठ प्रहरी उपरीक्षक रविराज श्रेष्ठले घटनाको छानबिन भइरहेको बताए । 'यति धेरै सुरक्षा जाँच छल्न माथिल्लो तहको मिलेमतोबिना सम्भव छैन, यसमा विमानस्थल र एयरलाइन्सका कर्मचारीसमेत मिलेका हुन सक्छन्,' प्रहरीका एक जना उच्च अधिकारीले भने, 'सोनी आफैंले पैसाको पोको लगेको होइन जस्तो देखिन्छ । शरीर खानतलासी नहुने व्यक्तिले उनलाई जहाजभित्र पैसा लगेर दिएको हुन सक्छ ।' विमानस्थलको सुरक्षाको जिम्मा नेपाल प्रहरीलाई मात्रै दिइएको छ । विमान जाँचका क्रममा शुक्रबार बेलुकी करिब दुई घन्टा त्रिभुवन अन्तर्राष्ट्रिय विमानस्थलमा उडान अवरुद्ध भएको थियो ।