हिन्दुहरुको परम्परागत साँस्कृतिक पर्व गाईजात्रा हर्षोल्लासका साथ मनाइंदै

 आज हिन्दुहरुको परम्परागत साँस्कृतिक पर्व गाईजात्रा। यो पर्व आज काठमाडौँ उपत्यकालगायत अधिराज्यका विभिन्न स्थानमा हर्षोल्लासका साथ मनाइँदैछ। आजदेखि शुरु भई अष्टमीका दिनसम्म ८ दिन मनाइने यस उत्सवमा एक वर्षभित्र दिवंगत हुनपुगेका आफ्ना परिवारका सदस्यहरुको सम्झनामा प्रतीकात्मक अभिव्यक्तिस्वरूप मानिसलाई गाईका रूपमा वा गाईलाई नै सिंगारेर नगर परिक्रमा गराइञ्छ। 

यसरी नगर परिक्रमा गर्दा यसै वर्ष मृत्यु भएका व्यक्तिको परिवारका सदस्य तथा श्रद्धालुहरु गाईको पुच्छर समाई वैतरणी नदी पार गरिन्छ भन्ने धार्मिक मान्यताका आधारमा गाईका नाममा फलफूल, दही, च्युरा, आदि दान गर्नेगर्दछन। गाईजात्रामा गाई र जोगीको भेषमा सिंगारिएका मानिसहरुले लाखे नाच प्रदर्शन गर्दछन। 

आजै मृतकका परिवारले मृतकको गुणगान र कीर्तिले भरिपूर्ण जीवन-चरित्रमा आधारित गीति-रचना रामायण गाएर नगर परिक्रमा गर्ने चलन छ। 

यस जात्रालाई काठमाडौँ उपत्यकाका साथै बनेपा, धुलिखेल, दोलखा, खोटाङ, भोजपुर, चैनपुर, इलाम, धनकुटा, धरान, बिराटनगर, बिरगंज, हेटौंडा, पोखरा, पाल्पा, डोटी, सुर्खेत आदि स्थानहरुमा पनि साँस्कृतिक पर्वका रूपमा मनाइने चलन छ।     

फाेटाे सौजन्य: गुगल