दैलेखबाट सुर्खेत पुगेका पत्रकारहरुद्वारा आफ्नो ज्यू-ज्यानको सुरक्षाको माग

दैलेखमा अस्ति भएको घटनापछि 'ज्यान मार्ने धम्की दिइएको' भन्दै त्यहाँका बाइसजना पत्रकारहरु सुर्खेत सदरमुकाम वीरेन्द्रनगर पुगेका छन्। 

नेपाल पत्रकार महासंघ मध्य-पश्चिम क्षेत्रीय समन्वय समितिको अगुवाइमा उनीहरुले आज मध्य-पश्चिमाञ्चल क्षेत्रीय प्रशासन कार्यालय सुर्खेतमा धर्ना दिए। एक घण्टा चलेको धर्ना महासंघ क्षेत्रीय संयोजक सुर्यमणी गौतमको नेतृत्वमा भएको थियो। धर्नामा नेपाल पत्रकार महासंघ प्रतिनिधि र सुर्खेतका पत्रकारहरु पनि सहभागी भए।  

ती पत्रकारहरुले वीरेन्द्रनगरमा सरकारी अधिकारीहरु, पत्रकार मित्रहरु र अन्य सम्बन्धित निकायका प्रतिनिघिहरुसङ्ग आफ्नो स्थितिका बारेमा छलफल गर्नुका साथै आफ्नो ज्यू-ज्यानको सुरक्षाको माग पनि गरेका छन्। 

पत्रकारहरु सुर्खेत गएपछि दैलेखबाट प्रकाशित हुने दुइवटा दैनिक र दुइवटा एफएम रेडियो बन्द भएको बताइएको छ।