असहमतिको श्रींखला: तीन दलबीचको आजको बैठक पनि निष्कर्षहीन

बजेटका सम्बन्धमा सहमति जुटाउने अन्तिम प्रयासस्वरूप आज बसेको तीन ठूला राजनीतिक दलहरु बीचको बैठक पनि विनासहमति टुङ्गिएको छ। नेपाली कङ्ग्रेसका सभापति सुशील कोइरालाको निवास महाराजगञ्जमा आज साँझ बसेको प्रमुख तीन दलको बैठकमा सबै पक्ष आ-आफ्नै अडानमा कायम रहेपछि बजेट, सहमतिको नयाँ सरकार, निर्बाचन कुनै पनि विषयमा कुरा मिल्न सकेन। 

राष्ट्रपति रामबरण यादवले सात गतेभित्र सहमति जुटाउन प्रमुख राजनीतिक दलका नेताहरुलाई पटक-पटक आग्रह गर्दा पनि दलहरु आफ्नो अडानबाट कत्ति पनि पछि हट्ने अवस्थामा देखिदैनन। नेपाली कांग्रेस र नेकपा एमालेले बाबुराम सरकारको बहिर्गमन नभएसम्म कुनै विषयमा पनि सहमति हुन नसक्ने अडान लिइरहेका छन् भने बजेटजस्तो राष्ट्रिय महत्वको विषयलाई राजनीतिक हतियार नबनाउन सरकार पक्षले प्रतिपक्षी दलहरुलाई आग्रह गरिरहेको छ।  

बैठकबाट बाहिरिएका नेताहरुले कुनै सहमति हुन नसकेको जानकारी संचारकर्मीहरुलाई दिए पनि उनीहरु हरेस भने खाएका देखिदैनन। सहमतिकै लागि वार्ता जारी राख्ने पक्षमा उनीहरुको अभिव्यक्ति आएकोछ।