चिनियाँ राष्ट्रपतिले नेपालीमा भन्नुभयो: नेपाली चिनियाँ दाजुभाइ, नेपाल चीन सम्बन्ध जिन्दावाद

डाँफे टेलिभिजनबाट साभार


चिनियाँ राष्ट्रपति सी चिनफिङले नेपाललाई भूपरिवेष्टित राष्ट्रबाट भूजडित राष्ट्र बन्ने सपना साकार पार्न चीनले सहयोग गर्ने बताउनुभएको छ। नेपालकाे दुई दिने राजकीय भ्रमणको क्रममा राष्ट्रपति सीले आफ्नो सम्मानमा आयोजित राजकीय भोजलाई सम्बोधन गर्ने क्रममा भूपरिवेष्ठितबाट भूजडित राष्ट्र बन्ने नेपालको सपना साकार पार्न सहयोग गर्ने बताउनुभएको हो।

राष्ट्रपति सीले नेपाल–चीन सीमापार रेलमा मार्गको सम्भाव्यता अध्ययनका लागि सहयोग गर्ने, सीमापार रेल मार्गको सम्भाव्यता अध्ययन गर्ने र काठमाडौंसम्मको सुरुङ मार्गलाई अघि बढाउन चीन सक्रिय हुने पनि बताउनुभयो। ‘सीमा पार रेल मार्गको सम्भाव्यता अध्ययन गर्ने, काठमाडौंसम्मको सुरुङ मार्गलाई अघि बढाउन सक्रिय हुने छौं, नेपाललाई भूपरिवेष्ठित देशबाट भूजडित देश बनाउन सहयोग गर्ने छौं।’

काठमाडौंमा मेरो पहिलो भ्रमण हो, नेपालको स्थायीत्व र जनताको सुखी जीवन प्रति म हर्षित छु, भविष्यप्रतिको आशा जागेको छ: राष्ट्रपति सीले भन्नुभयो। भ्रमणले दुई देशबीचको घनिष्ट राजनीतिक सम्बन्ध अझै बलियो र प्रगाढ बन्नेमा आफू आशावादी रहेको तथा चीन र नेपालले शताब्दिऔं देखिको मैत्रीपूर्ण सम्बन्धको नमूना विश्वमा पेश गरेको छ, नेपाल र चीनका बीचमा केही समस्या छैन, मित्रता मात्र छ, उहाँको भनाइ थियो।

राष्ट्रपति भण्डारी र आफूले चुनौती र कठिनाइलाई मिलेर सामना गरि अघि बढ्न सहमति गरेको सुनाउँदै नेपालमा भूकम्पपछिको पुनःनिर्माण परियोजनालाई चीनले सक्रियताका साथ अघि बढाइरहेको बताउनुभयाे। नेपालले सन् २०२० लाई भ्रमण वर्ष मनाउन लागेको भन्दै सीले यसबीचमा धेरै भन्दा धेरै चिनियाँ पर्यटकलाई नेपाल भ्रमणका लागि पठाउन उत्प्रेरित गर्ने अाश्वासन दिनुभयो। बुद्धको जन्म स्थल लुम्बिनीमा आगामी दिनमा धेरै भन्दा धेरै चिनियाँ पर्यटक आउने विश्वास व्यक्त गर्नुभयो।

चीन र नेपालले बहुपक्षीय सहकार्य गर्नेछन्। नेपाल र चीनले बहुलबाद र आर्थिक भूमण्डलीकरणलाई समर्थन गर्ने, जलवायु परिवर्तनको मिलेर सामना गर्नुपर्ने भन्दै सीले चीन सगरमाथा र हिमालय क्षेत्रको रक्षा गर्न सदा तत्पर रहेको बताउनुभयो। नेपालका नेतासँग मिलेर चीन र नेपालको विकासको खाका बनाउन पाएकोमा खुसी लागेको विचार ब्यक्त गर्नुभयो।

प्रधानमन्त्री केपी ओलीसँग द्वीपक्षीय सरोकारका विषयमा मिलेर अघि जाने निश्चित भएको भन्दै र शुरु गरेका योजनाहरुलाई पूरा गरेरै छोडौं, राष्ट्रपति सीले अनुभव सुनाउनु भयो।

दुई दिने राजकीय भ्रमणअन्तर्गत लागि शनिवार अपराह्न नेपाल अाउनु भएका सीले आफ्नो पहिलो काठमाडौं भ्रमणको आतिथ्यताका लागि नेपाललाई धन्यवाद दिनुभएकाे छ। भने अाफ्नाे मन्तब्यकाे अन्त्यमा नेपाली भाषामा बाेल्दै “नेपाली चिनियाँ दाजुभाइ, नेपाल चीन सम्बन्ध जिन्दावाद” भन्नुभएको थियो।

यसैगरी, चिनियाँ राष्ट्रपति सी चिनफिङको सम्मानमा आयोजित रात्रिभोजअघि दुई पक्षीय सम्बोधनका क्रममा होटल सोल्टीमा राष्ट्रपति विद्यादेवी भण्डारीले चीनको हितविरुद्ध नेपाली भूमि प्रयोग हुन नदिने प्रतिवद्धता जनाउनु भएको छ। नेपाल एक चीन नीतिप्रति पूर्ण प्रतिवद्ध छ, नेपाली भूमि चीनको हितविरुद्ध हुने कुनै पनि प्रकारका गतिविधि हुन नदिन सबै उपाय अपनाउँदै आएका छौँ, बताउनुभएको थियो।

राष्ट्रपति भण्डारीले नेपाल र चीन हिमाल र नदीबाट जोडिएको उल्लेख गर्दै सदियौँदेखि सामाजिक र सांस्कृतिक सम्बन्ध रहेको उल्लेख गर्नुभयो। उहाँले चिनियाँ भिक्षु र नेपाली कलाकारले दुई देशको सम्बन्धलाई अझ समृद्ध बनाएको उल्लेख गर्नुभयो। चीन र नेपालको सम्बन्ध सागरजस्तै गहिरो र सगरमाथाजस्तै उच्च भएको उहाँको भनाइ थियो। उहाँले बुद्धको जन्मस्थल लुम्बिनीलाई विश्व शान्तिको प्रतिक बनाउने नेपालको चाहना पूरा गर्ने पहल गरिदिन चिनियाँ राष्ट्रपति सीसमक्ष आग्रह गर्नुभयो। उहाँले भन्नुभयो: नेपालको लुम्बिनी बुद्धको जन्मस्थलमात्र नभए बौद्धधर्मावलम्बीको उद्गमस्थलसमेत हो, बुद्धभूमिलाई विश्व शान्तिको प्रतिक बनाउने हाम्रो पहलमा चीनको सहयोग रहने अपेक्षा गरेका छौँ। साेही अवसरमा राष्ट्रपति भण्डारीले केरुङ–काठमाडौं–लुम्बिनी रेलमार्ग हेर्ने नेपालीको चाहना रहेको भन्दै यो चाहना छिट्टै पूरा हुने विश्वास व्यक्त गर्नुभयो।

नेपाली जनताले केरुङदेखि काठमाडौं हुँदै लुम्बिनीसम्म रेलमार्ग जोडिएको हेर्न चाहेका छौँ, उनले चीनले प्राप्त गरेको उपलब्धिले नेपालीको यो चाहना छिट्टै पूरा हुने हाम्रो विश्वास छ। चीनसँगको सहकार्यलाई उच्च प्राथमिकतामा राखेकाे उल्लेख राष्ट्रपति भण्डारीले गर्नुभयो। यसका साथै राष्ट्रपति भण्डारीले चिनियाँ लगानीकर्तालाई उत्पादन र जलस्रोतका क्षेत्रमा लगानी गर्न आह्वान गर्नुभएकाे छ। चिनियाँ लगानीकर्तालाई उत्पादन र जलस्रोतका क्षेत्रमा लगानी गर्न आह्वान गर्दछौँ, सरकारले लगानीको पूर्ण सुरक्षा गर्नेछ, राष्ट्रपतिले प्रतिवद्धता ब्यक्त गर्नुभयो। राष्ट्रपति भण्डारीले जलवायु परिवर्तनका कारण पर्वतीय पर्यावरण संवेदनशील बनेको विषयसमेत उठाउनुभएको थियो। उहाँले आगामी वर्ष अप्रिलमा काठमाडौंमा सगरमाथा संवाद गर्ने तयारी भएको र त्यहाँ चिनियाँ प्रतिनिधिको उपस्थिति आवश्यक रहेको पनि उल्लेख गर्नुभएको थियो।

अन्त्यमा राष्ट्रपति भण्डारीले भन्नुभयो: नेपाल र चीनलाई निकट छिमेकी बनाएको छ। जनस्तरको सम्बन्धले हामीलाई घनिष्ठ मित्र बनाएको छ। दुवै देश र जनताको हितमा हुनेगरी चीन र नेपालको सम्बन्धलाई नयाँ उचाईमा लागने विश्वास व्यक्त गरेकी छु।