ओलीको स्वास्थ्यमा सुधार

नयाँदिल्ली, कार्तिक २३ - थप उपचारका लागि भारत पुरयाइएका एमाले नेता केपी ओलीको स्वास्थ्यमा सन्तोषजनक सुधार आएको  । श्वासप्रश्वासमा समस्या देखिएपछि काठमाडौंस्थित नर्भिक अस्पताल भर्ना भएका ओलीलाई थप उपचारका लागि एयर एम्बुलेन्समा नयाँ दिल्ली नजिकैको मेदान्त अस्पताल लगिएको थियो ।

'उहाँको स्वास्थ्यमा सुधार हुने क्रम सन्तोषजनक भएको चिकित्सकहरुले बताएका छन् । सम्भव: आइतवारभित्रै उहाँलाई आईसियुबाट वार्डमा सार्न सकिने उनीहरुले बताएका छन्,' ओलीका सहयोगी ईन्द्र भण्डारीले भने । अति सघन उपचार कक्ष आईसियुमा राखिएका ओलीलाई चिकित्सक यातिन मेहता नेतृत्त्वको टोलीले हेरिरहेको छ ।

ओलीलाई यसअघि हेर्ने गरेका अन्य भारतीय चिकित्सकहरुसँग पनि उनको पछिल्लो स्वास्थ्य प्रतिवेदनबारे बुधबारै छलफल गरिएको थियो । मृगौला प्रत्यारोपण गरेका ओलीको त्यससम्बन्धी नियमित जाँच नयाँ दिल्लीस्थित एपोलो अस्पतालका चिकित्सकहरुले गर्दै आएका थिए ।

'मृगौलमा कुनै पनि समस्या नदेखिएको चिकित्सकहरुले बताएका छन्,' ओलीको उपचारका लागि सक्रियतापूर्वक सघाइरहेका भारतीय समाजवादी नेता विजय प्रतापले भने । २००७ जुलाईमा ओलीको मृगौला प्रत्यारोपण गरिएको थियो ।

पछिल्लोपटक एक कार्यक्रमका लागि अमेरिका पुगेका ओली बिरामी भएपछि न्यूयोर्कस्थित अस्पतालमा भर्ना गरिएका थिए । त्यहाँ केही सुधार भएपछि स्वदेश फर्किएका ओलीलाई पुनः समस्या देखिएपछि नर्भिक हुँदै मेदान्त ल्याइएको थियो ।

मेदान्तका चिकित्सकहरुले ओलीसँगको भेटघाटमा पनि कडाईं गरेका छन् । दैनिक निश्चित समयका लागि एक जनालाई मात्रै ओलीसँग भेट्न अनुमति दिइएको भण्डारीले जानकारी दिए ।

यसैबीच दुई जना नेपाली चिकित्सक दिलिप शर्मा र कैलाश भण्डारी ओलीलाई भेट्न बुधबारै काठमाडौंबाट मेदान्त पुगेका छन् ।