अफगानीस्तानको राजधानी काबुलमा प्रहरीको मुख्यालयभित्रै एकजना गैह्र-सैनिक अमेरिकीको हत्या

अफगानीस्तानको राजधानी काबुलमा प्रहरीको मुख्यालयभित्रै एकजना गैह्र-सैनिक अमेरिकीको हत्या भएको छ । अफगानी प्रहरीको पोशाक लगाएर आएकी एक युवतीले नेटो सैनिकका सल्लाहकार भएको भनिएका ती अमेरिकी नागरिकलाई सुरक्षाकर्मीहरुकै अगाडि नै गोली हानेर हत्या गरेकी हुन् ।

कडा सुरक्षा व्यवस्था भएको प्रहरी मुख्यालय भित्रै पसेर  कुनै महिलाले यस्तो हत्या गरेको यो पहिलो घटना भएको बताइएको छ। नर्गिस नाम गरेकी ती युवती हाल प्रहरी हिरासतमा छिन् । गोली हान्ने ती युवती आतंकबादी तालिवानको प्रतिनिधि पनि हुनसक्ने आशंकामा उनका बारेमा गम्भीर अनुसन्धान भइरहेको जानकारी अफगानी प्रहरीले दिएको छ ।

एउटा अर्को घटनामा, अफगानीस्तानको उत्तरी क्षेत्रमा एकजना प्रहरी अधिकृतले गोली हानेर पाँचजना सहकर्मीको हत्या गरेका छन् । पछिल्लो समयमा अफगानी प्रहरीद्वारा आफ्नै सहकर्मी अथवा विदेशीलाई गोली हान्ने क्रम बढ्दो छ ।

अफगानी सरकारले पछिल्लो समयमा ग्रामीण भेगका महिलालाई प्रहरीमा भर्ना गर्ने क्रम बढाएको छ । यस अबसरको फाइदा उठाई तालिबानले आफ्ना समर्थकहरुलाई प्रहरीमा भर्ना हुन पठाएको आशंका गरिएको छ । नयाँ भर्ना भएका प्रहरीमध्ये केही तालिबान छाडेर आएका महिलाहरु पनि भएको बताइएको छ।

अफागानीस्तानबाट सन् २०१४ सम्ममा सबै नाटो सैनिक फिर्ता बोलाउने तयारी भैरहेको अवस्थामा त्यहाकै प्रहरी र सैनिकलाई अहिले तालिम दिनथालिएको छ जसमा महिला प्रहरी पनि समावेश छन। 

तस्विर सौजन्य: बिबिसी