मन्त्रिपरिषद्को आजको बैठकद्वारा केही महत्वपूर्ण नियुक्ति

मन्त्रिपरिषद्को आज मंगलबार बसेको बैठकले केही महत्वपूर्ण नियुक्तिहरू गरेको छ।

बैठकले विद्युत प्राधिकरणको अध्यक्षमा मुख्य सचिव लिलामणि पौडेललाई नियुक्त गरेको छ । यसअघि ऊर्जा मन्त्री वा सचिवले विद्युत प्राधिकरण अध्यक्षको जिम्मेवारी सम्हाल्ने परम्परा थियो।

बैठकले प्राधिकरणको कार्यकारी निर्देशकमा खुल्ला प्रतिस्पर्धाबाट छानिएका रामेश्वर यादवलाई नियुक्ति गरिएको छ भने दुर सञ्चार प्राधिकरणको अध्यक्षमा दीगम्बर झालाई नियुक्त गरेको छ । झा लामो समयदेखि नेपाल आयल निगमका महाप्रबन्धक हुनुहुन्थ्यो।

यसैगरी, लुम्बिनी विकासक कोषको सदस्य-सचिवमा जगतबहादुर तामाङ, सुदूर पश्चिम विकास आयोगको अध्यक्षमा जगदिशबहादुर पाल र कर्णाली विकास आयोगको अध्यक्षमा डा. कुल बहादुर रोकायालाई बैठकले नियुक्त गरेको छ ।