सौराहामा अन्तर्राष्ट्रिय हात्ती महोत्सवको रमझम

चितवन, पुस ११ - चितवनको पर्यटकिय नगरी सौराहामा आजबाट नवौं अन्र्तराष्ट्रिय हात्ती महोत्सव शुरु भएको छ । सौराहा स्थित बाघमारा सामुदायिक वनको चौरमा आयोजना भइरहेको प्रतियोगितामा विभिन्न होटल एवं प्रतिष्ठान प्रतिनिधित्व गरेका स्वदेशी ८ र विदेशी १६ गरि २४ टिमले सहभागिता जनाएका छन् ।

आज भएको पहिलो चरणको खेलबाट १२ हात्ती सेमी फाईनलमा प्रवेश गरेका छन् । ति मध्ये ८ घरेलु र चार विदेशी संस्थाबाट प्रतिनिधीत्व गरेकाहरु छन् । घरेलु टोली अन्र्तगत सेमिफाईलनमा प्रवेश गर्नेहरुमा चितवन राष्ट्रिय निकुञ्जको एकताकली, होटल बाराही पोखराको बहादुरगज, हिमालयन ईन्कान्टरको ब्यूटीकली, हिमालयन डिष्टिलरीको रानीमायाकली लगायतका छन् ।

त्यस्तै अत्याधिक दर्शकको रोजाईमा पर्ने हात्तीको छावा बिचको फुटबल प्रतियोगिता अर्न्तगत गौरीशंकर डेभलपमेन्ट बैंक विजयी भएको छ । गौरीशंकरले रोटरी क्लबलाई पेनाल्टी शुट आउटमा २-१ ले पराजित गर्दै सेमीफाईनल प्रवेश गर्यो । खचाखच दर्शकले भरिएको चौरमा छावाहरुले फुटबल खेलिरहदा दर्शकहरुले चर्को हुटिंग गरेका थिए । त्यस्तै गरि आज सम्पन्न पहिलो चरणको टांगा र गाडा दौड तर्फ विभिन्न होटल र प्रतिष्ठान प्रतिधित्व गरेका १२/१२ टांगा, गाडा अर्को चरणमा प्रवेश गरेका छन् । प्रतियोगिता अवलोकन गर्न आन्तरिक तथा बाह्य पर्यटकको खेल स्थलमा बाक्लो उपस्थिती रहेको थियो । अंग्रेजी नयां वर्ष र क्रिसमसको अवसर पारेर विदेशी पर्यटकको बसाई लम्ब्याउन आयोजक क्षेत्रीय होटल संघ सौराहाले हात्ती महोत्सव गर्दै आईरहेको छ ।

हात्ती दौडको आज एक भव्य समारोह बिच उपप्रधान एवं परराष्ट्र मन्त्री नारायणकाजी श्रेष्ठले उदघाटन गर्नुभएको थियो । उदघाटन पुर्व विभिन्न जातजाति सहितको झांकीले सौराहामा शोभा यात्रा तथा गरेको थियो । उदघाटन कार्यक्रममा वनजंगल, वन्जयन्तुमा संरक्षण पुर्‍याएको भन्दै हात्ती प्रजजन केन्द्रका रामेश्वर चौधरीलाई आयोजक क्षेत्रिय होटल संघ सौराहाले नगद १० हजार सहित पुरस्कृत गरेको छ । त्यस्तै पर्यटन विकास र समाजसेवामा योगदान पुर्‍याएको भन्दै गोपालप्रसाद अधिकारी र पुर्णमान श्रेष्ठलाई सम्मान गरेको छ । साभार: इकान्तिपुर