हमास आन्दोलन र इजरेलबीच युद्ध बिराम: उल्लंघन भएको छैन

गाजामा शासन चलाइरहेको हमास आन्दोलन र इजरेलबीच युद्ध बिराम भएको छ। त्यसै त गुलेलिले चरा मार्न मात्र सक्षम हमासलाई सात दिनसम्म इजरेली रकेट र बमले गोदेर थन्तिलो पारिसकेको अवस्थामा युद्ध बिरामले पार्ने असर भनेको निहत्था र निर्दोष प्यालेस्टिनी जनताको ज्यू-ज्यान र धन-सम्पत्तिको रक्षा हुनु र रातको निन्द्रा र दिनको शान्ति भङ्ग नहुनु हो। यस अर्थमा युद्ध बिरामको स्वागत गर्नै पर्छ। साधुबाद छ, अरब लिग र अमेरिकाको प्रयासलाई। 

हाल लागू भैसकेको यस युद्ध बिरामका शर्तअनुसार, सबै प्रकारको सत्रुता र लक्षित हत्याको अन्त्य गर्न इजरेल सहमत भएको छ, भने हमासले इजरेल विरुद्ध उसको सीमा क्षेत्रमा आक्रमण गर्नेछैन।   गत हप्ता शुरु भएको हिंसाको आगोमा जलेर चार-पांचजना इज्रेलिलागायत कम्तिमा एक सय सन्ताउन्नजना प्यालेस्टिनी मारिएपछि भएको यस युद्ध बिरामले हतियार बेचेर पैसा कमाउने र आफ्ना प्रतिद्वन्दीको विनाश गर्ने कसै-कसैको इछ्यामा भने कुठाराघात भएको हुनसक्छ।

युद्ध बिरामको अन्तिम घडी- राति बाह्र बजेसम्म दुवै पक्षबाट आक्रमण भैरहे तापनि त्यसपछि भने युद्ध बिराम भंग गर्ने काम कुनै पनि पक्षबाट नभएको बिबिसीले जनाएको छ।