राष्ट्रपति रामवरण यादवसँग प्रधानमन्त्री डा बाबुराम भट्टराईले आज विहान राष्ट्रपति भवन शितल निवासमा भेटवार्ता गर्नुभयो।
भेटवार्तामा संयुक्त राष्ट्र सङ्घीय शान्ति स्थापना कार्यका लागि दक्षिणी सुडानमा खटिएका नेपाली सेनाका महासेनानी कुमार लामालाई बिदाको समयमा आफ्ना परिजनलाई भेट्न बेलायत पुगेका बेला पक्राउ परेका विषयमा छलफल भएको थियो ।
भेटवार्तामा प्रधानमन्त्री भट्टराईले दलहरुबीच सहमति कायम गरी समयमै मेलमिलाप तथा सत्यनिरुपण आयोग गठन हुन नसक्दा यस्ता घटनाहरु हुनगएको बताउनुभयो।
विगतको द्वन्द्वकालमा राजापक्ष र विद्रोही पक्षबाट मानव अधिकार विपरीतका घटना भए-नभएकोबारे ती आयोगले टुङ्ग्याउने र यस विषयमा अन्य पक्षबाट अप्ठ्यारो सिर्जना गर्ने अवस्था आउन नदिन दलहरुबीच सहमति कायम गरी आयोग गठनको विषयलाई पूर्णता दिनुपर्ने विषयमा राष्ट्रपतिसङ्ग प्रधानमन्त्रीले छलफल गर्नुभएको बताइएको छ ।
भेटपछि सञ्चारकर्मीको जिज्ञासामा प्रधानमन्त्री भट्टराईले बाहिर प्रचार गरिएजस्तो राष्ट्रपति र आफूबीच दूरी नबढेको भन्दै दलहरुलाई सहमतिमा ल्याएर अहिलेको राजनीतिक र संवैधानिक गतिरोधको अन्त्यका लागि आफूले पहल गर्ने कुरा बताउनुभयो।
वर्तमान राजनीतिक गतिरोधको अन्त्यका लागि दलहरुबीच भइरहेका प्रयासबारे र पछिल्लो विकसित राजनीतिक घटनाक्रमबारे राष्ट्रपतिलाई अवगत गराएको जानकारी प्रधानमन्त्रीले दिनुभयो। रासस
तस्विर सौजन्य: इकान्तिपुर
No comments:
Post a Comment