राष्ट्रिय सहमतिको सरकार गठन हुन नसक्नुमा मुख्य तीन दल नै प्रमुख दोषी: राष्ट्रपति यादव

राष्ट्रपति रामवरण यादवले सहमतिका लागि दलहरुलाई प्रोत्साहित गर्ने, ध्यानाकर्षण गराउने, आग्रह गर्नेबाहेक आफूले गर्नसक्ने ठाउँ अरू कहीं कतै नभएको कुरा बताउनुभएको छ। वर्तमान राजनीतिक अवस्थाका बारेमा साना दलका नेताहरूसँग हिजो गर्नुभएको छलफलमा राष्ट्रपति यादवले राष्ट्रिय सहमतिको सरकार गठन हुन नसक्नुमा मुख्य तीन दल नै प्रमुख दोषी रहेको विचार व्यक्त गर्नुभयो। 

सहमतिको सरकारका लागि आठ पटक म्याद थपिसक्दा पनि निकास निकाल्न नसक्ने ठूला दलहरूले नै वर्तमान अवस्थाका लागि सम्पूर्ण जिम्मेवारी लिनुपर्ने जिकिर गर्दै  राष्ट्रपतिले यसका लागि अरू कसैलाई पनि दोषारोपण गर्न नमिल्ने कुरा बताउनुभयो।

सरकार गठन हुन नसकेकामा राष्ट्रपति असफल भएको भनी गरिएको टिप्पणीको खण्डन गर्दै यादवले ठूला दलहरूका कारण नै मुलुक अधोगतितिर गइरहेको टिप्पणी गर्नुभयो। 'मेरो कुनै दोष छैन, ठूला दलहरूका कारण नै निकास ननिस्केको हो', राष्ट्रपतिको भनाइ उद्धृत गर्दै नेकपा मालेका महासचिव सीपी मैनालीले संचारकर्मीहरुसङ्गको कुराकानीमा भन्नुभयो, 'म विवादमा पर्न चाहन्न, मैले संविधानअनुसार जे-जति गर्नुपर्ने हो गरिरहेको छु, निकास निकाल्ने काम उहाँ (ठूला दल) हरूको हो।'

दलहरूकै आग्रहअनुसार छलफल गरी समय दिए पनि पटक-पटक थपिएका समय निरर्थक भएकामा दुःखमनाउ गर्दै राष्ट्रपतिले यस्तै भइरहे मुलुक असफल हुने र त्यसको जिम्मा तीन दलले नै लिनुपर्ने बताए ।

दलहरूले दिएको सल्लाहको परिधिभन्दा बाहिर गएर काम गर्नु अनुचित भएको हुँदा अर्को विकल्प आफूले खोज्न नमिल्ने कुरा राष्ट्रपतिले बताउनुएभएको मैनालीले जानकारी दिनुभयो। 

यसै सरकारलाई पूर्णता दिनका लागि पनि पहिले प्रधानमन्त्रीले राजीनामा दिनुपर्ने विचार राष्ट्रपति यादवले व्यक्त गर्नुभएको थियो। 

मेरो विचार: आफैले तिमी काचलाउ भएउ भनी चिट्ठी थमाएका विचार बाबुरामको राजीनामाको कुरा के आधारमा गरेकोहोला राष्ट्रपति महोदयले? सहमति हुन नसके अन्तर्राष्ट्रिय मान्यता र अभ्यासका आधारमा अघि बढ्ने भनेर आफै भन्ने, अनि कामचलाउका सन्दर्भमा त्यसलाई विर्सने?  

वर्तमान राजनीतिक अवस्थाको निकास कसरी निकाल्ने भन्नेबारे राष्ट्रपति यादवले आइतबार गर्नुभएको छलफलमा मधेसी जनअधिकार फोरम नेपालका अध्यक्ष उपेन्द्र यादव, नेमकिपाका अध्यक्ष नारायणमान बिजुक्छे, राजमोका अध्यक्ष चित्रबहादुर केसी, नेकपा संयुक्तका अध्यक्ष चन्द्रदेव जोशी र मालेका महासचिव सिपी मैनाली सहभागी हुनुहुन्थ्यो।