निर्वाचन आयोगको कार्यवाहक प्रमुखमा गुरुङ

कार्यवाहक प्रमुख निर्वाचन आयुक्त निलकण्ठ उप्रेतीले आजदेखि अवकाश पाएपछि प्रमुख निर्वाचन आयुक्तको जिम्मेवारी वरिष्ठताका आधारमा आयोगका आयुक्त दोलखबहादुर गुरुङले पाएका छन् ।

सेवा अवधि पूरा गर्नुभएका प्रमुख निर्वाचन आयुक्त उपे्रतीले बुधबारदेखि स्वतः अवकाश पाएका हुन् । निर्वाचन आयोगका प्रवक्ता शारदाप्रसाद त्रितालले प्रमुख निर्वाचन आयुक्त उप्रेतीले बिहीबारदेखि कार्यालय नआउने सूचना पठाएको बताउँदै वरिष्ठताका आधारमा आयुक्त गुरुङले भोलि बिहीबारदेखि कार्यवाहक प्रमुख निर्वाचन आयुक्तको जिम्मेवारी सम्हाल्ने बताए । 

प्रवक्ता त्रितालका अनुसार संवैधानिक निकायका पदाधिकारीहरुको पारिश्रमिक सेवा सर्तका बारेमा व्यवस्था गर्न बनेको ऐन, २०५३ ले वरिष्ठताका आधारमा भनेकाले गुरुङले जिम्मेवारी सम्हाल्ने भएको हो ।

विसं २०६६ जेठमा प्रमुख निर्वाचन आयुक्त भोजराज पोखरेलले अवकाश लिएपछि उप्रेती कार्यवाहक प्रमुख बनेका थिए । आयुक्त गुरुङले कार्यवाहकको जिम्मेवारी पुससम्म मात्रै निर्वाह गर्नेछन् ।

संविधानले एक प्रमुख निर्वाचन आयुक्त र चार आयुक्त रहनुपर्ने व्यवस्था गरेपनि नयाँ नियुक्ति हुन सकेको छैन । अब आयोगमा एक कार्यवाहक निर्वाचन आयुक्त र आयुक्त अयोधीप्रसाद यादवमात्र छन् । उनीहरु दुवैजनाको कार्यावधि पुससम्म मात्रै हो ।