काठमाडौ, कार्तिक २२ - राष्ट्रपति रामवरण यादव र कांग्रेस सभापति सुशील कोइरालाबीच बुधबार बिहान बजेट, निर्वाचन र संविधानलगायतका समसामयिक विषयमा छलफल भएको छ ।
राष्ट्रपति भवन शीतलनिवासमा भएको सो भेटवार्तामा राष्ट्रपति यादवले बजेट, निर्वाचनलगायतका विषयमा छिटो सहमति गरेर राजनीतिक निकास दिन आग्रह गरेका थिए ।
संविधानसभा भङ्ग भएयता बढ्दो राजनीतिक सङ्कटबाट मुलुकलाई निकास दिन राष्ट्रपति यादवले विभिन्न दलका शीर्ष नेताहरुलाई बेग्लाबेग्लै र सामूहिकरुपमा भेट्दै आएका छन् । ती भेटमा राष्ट्रपति डा यादवले दलका नेताहरुलाई छिटो सहमतिमा पुगेर राजनीतिक निकास खोज्न आग्रह गर्दै आएका छन् ।
राष्ट्रपति डा यादव मुलुकको अवस्थाप्रति झन् चिन्तित भएको पाएको भन्दै सभापति कोइरालाले बजेटको बेला आएकाले छिटो सहमतिमा पुग्नुपर्नेमा जोड दिएका थिए ।
“अध्यादेशबाट बजेट आउनु भनेको प्रजातन्त्रको मान्यताविपरीत भएकाले यसलाई छिटोभन्दा छिटो सहमति गरेर टुङ्ग्याउनुस्,” भेटवार्तामा राष्ट्रपतिसँग भएको भनाइ उद्धृत गर्दै सभापति कोइरालाले भने ।
अहिलेको अवस्थामा सहमति भएन भने कस्तो स्थिति आउने हो भनेरराष्ट्रपति मा झन् चिन्ता बढेको देखिएको पनि सभापति कोइरालाले बताए ।
राष्ट्रपति यादवले चुनाव र संविधानको बारेमा पनि छिटो टुङ्गो लगाउन सके मुलुकले राहतको सास फेर्न पाउने सुझाव दिएका थिए ।
सभापति कोइरालाले भने बजेट अध्यादेश अस्वीकार गर्नुपर्ने भनेर प्रतिपक्षी दलहरुले भन्दै आएको बताउँदै राजनीतिक सहमति गरेर राष्ट्रिय सहमतिका लागि वर्तमान प्रधानमन्त्रीले मार्ग प्रशस्त गर्नुपर्ने बताए ।
दलहरुबीच विश्वासको सङ्कट रहेकाले विश्वासको वातावरण बनाउन पनि प्रधानमन्त्रीले मार्गप्रशस्त गर्नुपर्ने सभापति कोइरालाको भनाइ थियो ।
मंगलबार अर्थमन्त्रीसँगको भेटमा उनले बजेटसँगै अरु कुरा पनि मिल्छ भनेो तर आफूले उल्टो कुरा नगर्न भनेको उल्लेख गर्दै सभापति कोइरालाले वर्तमान सरकारले मार्ग प्रशस्त गरे विश्वासको वातावरण तयार हुने, त्यसैले बजेटलगायतका अन्य कुरामा पनि सहमतिको वातावरण बन्ने बताए ।
रासस
रासस
No comments:
Post a Comment