मन्त्रिपरिषद्को आजको बैठकद्वारा विभिन्न निर्णय र नियुक्ति

मन्त्रिपरिषद्को आज साँझ बसेको बैठकले साठी मेगावाट क्षमताको माथिल्लो त्रिसुली- ३ ए जलविद्युत् परियोजनाको क्षमता वृद्धी गरी परियोजनालाई ९० मेगावाटको बनाउन स्वीकृति दिएको छ। अर्थमन्त्री वर्षमान पुनले संचारकर्मीहरुसङ्ग कुरा गर्दै सो कुराको जानकारी दिनुभएको हो। 

तोकिएको क्षमता बढाउनका लागि नयाँ टेन्डर आहृवान गर्नुपर्ने व्यवस्थालाई वेवास्ता गर्दै सरकारले मन्त्रिपरिषदबाटै स्वीकृति दिएको भन्दै यसको विरोध गर्नथालिएको छ। 

मन्त्रिपरिषद्को आजैको बैठकले गुठी संस्थानको सञ्चालक समितिको अध्यक्षमा पञ्चलाल महर्जन, र  राष्ट्रिय बीउ-बिजन कम्पनी लिमिटेडको अध्यक्षमा सत्यनारायण भगतलाई नियुक्त गरेकोछ भने कैलाश गुरुङ, गोविन्दराज गुरुङ, सुवर्ण विष्ट र आशिषविक्रम राणालाई नेपाली सेनाको चालक महासेनानीमा बढुवा गरेको छ। 

त्यसैगरी, बैठकले देशभरिका चार सय पच्चीसवटा उप-स्वास्थ्य चौकीलाई स्वास्थ्य चौकीमा स्तरोन्नति गर्ने निर्णय गरेको छ। र स्थानीय शान्ति समितिहरुको म्याद आगामी असार मसान्तसम्मका लागि थप गरेकोछ।