पूर्वसभासदद्वारा बालिकाको यौन शोषण

एकीकृत नेकपा माओवादीका पूर्वसभासद सफिक मियाँले एक वर्षदेखि घरमै राखेर एक बालिकाको यौन शोषण गर्दै आएको खुलासा भएको छ। उनले कास्कीकै एक गाउँबाट गरिब परिवारकी १३ वर्षीया बालिकालाई कामदारका रुपमा घरमै राखेर यौन शोषण गरेको पीडितका परिवारले प्रहरीमा उजुरी दिएको छ।

पीडित बालिकाले आफूलाई मियाँले डरधाक र प्रलोभनमा पारेर प्राकृतिक र अप्राकृतिक रुपमा नियमित यौन शोषण गर्नेगरेको  बयान प्रहरीसमक्ष दिएकी छन्। प्रहरीले शुक्रबार साँझ पोखरा-९ नयाँ बजारस्थित मियाँको डेराबाट ती बालिकालाई उद्धार गरेको हो। पूर्वसभासद मियाँ फरार छन्। मियाँ विघटित संविधानसभामा समानुपातिकतर्फका सभासद थिए। 

मियाँले बालिकालाई घरायसी काममा लगाउने भन्दै बाबु-आमाकै सहमतिमा घरमा राखेका थिए। घरमा काम गर्ने बालिकासँग आफ्ना श्रीमान्ले यौन दुर्व्यवहार गर्नेगरेको खुलासा उनकी पत्नी सुवेदा खान मियाँले नै गरेकी छन्। उनले आफूले समेत कैयौं पटक रंगेहात फेला पारेको बताइन्।