अस्ट्रेलिया नयाँ वर्षको रमझममा: सिड्नी बन्दरगाहको चमकदार कार्यक्रममा करिब सात टन पटका पट्काइयो

ग्रिगोरियन पात्रोअनुसारको नयाँ वर्ष शुरु भएको छ, न्युजिल्याण्डमा, अनि अस्ट्रेलियामा पनि। यस खुशियाली मनाउन  न्युजिल्याण्डको सबैभन्दा ठूलो शहर अक्ल्यान्डको तीन सय अट्ठाइस मिटर अग्लो सिटी स्काई टावरमा मद्य रातको घन्टी बज्नासाथ पटकाको उज्यालोले आकास झलाकार बनाएकोथियो। 

त्यस्तै अस्ट्रेलियाको लोकप्रिय सिड्नी बन्दरगाहको चमकदार कार्यक्रम हेर्न बन्दरगाह वरपर लाखौं मानिस भेला भएका थिए। त्यहाँ करिब सात टन पटका पट्काइएको अनुमान गरिएको छ। 

यस वर्ष म्यान्मामा पनि नयाँ वर्षको रमझम हुनेभएको छ। 

भारतको राजधानी नयाँ दिल्लीमा भने सामूहिक बलात्कारका कारण तेइस वर्षीया युवतीको मृत्यु भएपछि सेनाले देशभरिको खुशियाली कार्यक्रम रद्द गरेको छ। 

पंजाव र हरियाणा सरकारले पनि नयाँ वर्षको आगमनको खुशियालीमा आयोजना गरिने सबै कार्यक्रम रद्द गरेको बिबिसीले जनाएको छ। 

अमेरिका र यूरोपमा नयाँ वर्षका कार्यक्रमहरु यथावतरुपमा गरिने छन्।

तस्विर सौजन्य: बिबिसी  

               HAPPY NEW YEAR 2013 TO ALL THE PEOPLES AROUND THE GLOBE!!!
                Wish you all for the Peaceful, Prosperous and Happy ever year 2013!

                                                    Kamal Lamsal from Nepal

तिमी कसको हुनेहोला- अन्जु पन्त र स्वरुप आचार्य

अब प्रधानमन्त्रीको ज्यादती विरुद्ध आन्दोलन थालिने: नेकपा एमालेका बरिष्ठ नेता माधवकुमार नेपाल

पूर्व प्रधानमन्त्री एवम् नेकपा एमालेका बरिष्ठ नेता माधवकुमार नेपालले जर्वजस्ती नहटाउँदासम्म सत्ता छाड्ने स्थिति नदेखिएकाले अब प्रधानमन्त्रीको ज्यादती विरुद्ध आन्दोलन थालिने कुरा स्पष्ट पार्नुभएछ। 

'नाच्न नजान्ने, आँगन टेढो' भनेजस्तै भयो कि, कता। संवैधानिक रिक्तताको स्थिति सिर्जना गरेर कामचलाउले कता हटिदिनु? विरोधी पक्ष- कांग्रेस र एमालेले यदि साँच्चिकै यस देशको हितकै लागि बाबुराम भट्टराईको राजिनामा मागिरहेको हो भने, उनीहरुले बाबुरामलाई धन्यबाद दिनुपर्छ, उहाँले कुर्ची नछोडेर देशलाई अलपत्र हुनबाट जोगाइदिनुभएकोमा। 

सर्वप्रथम, विरोधी पक्षले बुझ्नैपर्ने कुरा हो, कामचलाउले राजिनामा दिदैन। प्रतिपक्षबाट प्रधानमन्त्रीको उम्मेदवारी आएर राष्ट्रपतिकहाँ पुगेपछि शपथ ग्रहण गराएलगत्तै नयाँ वैधानिक प्रधानमन्त्रीले पदभार ग्रहण गर्छ, कामचलाउ स्वतः बाहिरिन्छ। 

यो संसद बहाल रहेको अवस्थाको कुरा भयो। संसद बिघटन भएको अवस्थामा, शायद, बिघटन हुँदा सत्तामा रहेको सरकारले नै कामचलाउको हैसियतमा नयाँ निर्वाचन गराएर संसदले पछि छान्ने प्रधानमन्त्रीले सत्ता सम्हालेपछि कामचलाउ स्वतः बाहिरिन्छ। 

मेरो विचारमा, संसदीय मान्यता भएका मुलुकको परिपाटी यही हो। हाम्रो देशमा त सत्तामा नरहेर चुनाबमा जानुपर्यो भने राज्य संयन्त्रको दुरुपयोग नभए पनि उपयोग गर्न पाइदैन भन्ने चिन्ताले सताएजस्तो छ, विरोधीहरुलाई। त्यसैले बाबुरामलाई हटाएर चुनाबी सरकार आफ्नो नेतृत्वमा गठन गर्नका लागि नेताहरु तल्लो स्तरको गालीगलौजमा उत्रेको देखिन्छ। 

बाबुरामको नेतृत्वमा सहमति गर्न नचाहने, आफ्नो नेतृत्वमा सहमति गर भन्ने। विवेकपूर्ण तरिकाले सोच्दा, चुनाब गराउनका लागि वैधानिक अधिकार पाएको सरकार त बाबुरामकै हो है। यसो भए तापनि, बाबुराम भट्टराईले लचकता अपनाउनु नै भएको छ। पहिलेको विघटित संविधान सभाले सहमति गरेका विषयहरुको स्वामीत्व ग्रहण गरौँ, संवैधानिक निकायमा रिक्त रहेका पदहरुमा नियुक्ति गरौँ, चुनाव गराउने निश्चित गरौँ, म सत्ता छोड्न तयार छु भनेर बाबुराम भट्टराईले भन्नुभएकै छ। ती विषयहरुमा सहमति गरेर सत्तामा जान बाबुराम विरोधी दलहरुलाई के बाधा छ? उपरोक्त विषयहरुमा सहमति गरेर सत्तामा गएपछि त तीनको पालना गर्ने पर्छ भन्ने डर हो कि सहमति गर्न नचाहनुको? त्यसो हो भने, कुर्चीकै लागि लडाई गर्ने तपाईहरु सत्तामा पुगेपछि नेपाल र नेपाली जनतालाई के फाइदा हुन्छ, बाबुराम हुँदा के घाटा भएको छ?   तस्विर सौजन्य: इकान्तिपुर    

अमेरिकी कांग्रेसका नेताहरुसङ्ग "वित्तीय पहरो' 'फुटाउन' अझै एक दिन बाँकी

अमेरिकी कांग्रेसका नेताहरुसङ्ग "वित्तीय पहरो' भनिने तिब्र कर बृद्धि र खर्च कटौतीको खतरालाई रोक्नका लागि अझै एक दिन बाँकी छ। यस विषयक विधेयकलाई छलफलका लागि सोमबार संसदमा पठाउनुअघि सहमति जुटाउनका लागि सांसदहरुले वार्ता जारी राख्नेभएका छन। जनवरी एक तारिखसम्म यस विषयमा सहमति जुट्न नसकेको खण्डमा अमेरिका फेरि मन्दीको चपेटामा पर्ने खतरा रहेको बताइएको छ। 

अमेरिकी राष्ट्रपति बराक ओबामाले यस विषयमा विद्यमान गतिरोधका लागि रिपब्लिकनहरुमाथि दोष लगाउँदै सहमतिमा आउन उनीहरुमाथि दबाब सिर्जना गर्दैआउनुभएको छ। 

राष्ट्रपति ओबामाले देश-हितका लागि धनिहरुले अलिकति बढी कर तिर्नुपर्ने कुरामा जोड दिदैआउनुभएको छ भने रिपब्लिकनहरु कर बढाउने पक्षमा देखिएका छैनन।  चित्र सौजन्य: बिबिसी 

अमेरिकी विदेशमन्त्री हिलारी क्लिन्टन बिरामी परेपछि न्यू-योर्कको अस्पतालमा भर्ना

अमेरिकी विदेशमन्त्री हिलारी क्लिन्टन रजतमा गिर्खा देखापरेपछि न्यू-योर्कको अस्पतालमा भर्ना हुनुभएको छ। विदेशमन्त्री क्लिन्टन यस महिनाको शुरुमा बेहोस भएर लड्नुभएको थियो। 

त्यति बेला उहाँको पेटमा किटाणु भएको, तर बिजलनपछि, अर्थात् पेटमा भएको पानी निकालिएपछि, यो समस्या टरेको भनिएको थियो। श्रीमती क्लिन्टनका प्रवक्ता फिलिपे रेइन्सले दिएको जानकारीअनुसार, चिकित्सकहरुले आइतबार गरेको अनुगमन परिक्षणमा उहाँको रगतमा जमेका टुक्रा देखापरेको बताएका छन्। 

श्रीमती क्लिन्टनलाई अहिले रगत पातल्याउने औषधि दिइएको र आगामी अठचालिस घन्टासम्म उहाँलाई चिकित्सकहरुको निगरानीमा राखिएको बताइएको छ। 

श्रीमती क्लिन्टनले आगामी जनवरी महिनामा राष्ट्रपति ओबामाले औपचारिक रुपमा दोश्रो अवधिको कार्यभार सम्हालेपछि विदेशमन्त्री पद छोड्नुपर्ने छ।   चित्र सौजन्य: बिबिसी 

कसैमा अलिकति विवेक त हुनैपर्ने होइन र?!

बाँदरको हातमा नरिवल परेपछि के गर्ने? यता ठोक्ने, उता ठोक्ने, फुट्यो भने खाने, नत्र भने त्यसै छोडेर हिंड्ने, हैन त? लुम्बिनीलाई विश्वस्तरको पर्यटकीय स्थलमा परिणत गरिदिन्छौं, भजाएर खाउ भन्ने दानी आउँदा समेत वास्ता नगर्ने नेपालीमा नेपालमा नचल्ने नोट साँचेर राख्ने बुद्धी कहाँबाट आउंथ्यो! बुद्धी भए त मुद्रा नचल्ने ती देशका नोटहरु पनि जम्मा गरेर व्यवस्थित तरिकाले राखेको भए, तिनै भिक्षुहरुले साटेर परिवर्त्य मुद्रा दिनसक्थे नेपाललाई। तर यो दूरदर्शिता न नेपालका सरकारमा रहनेहरूमा देखियो, न नेपाल राष्ट्र बैंकको व्यवस्थापन पक्षमा, न त लुम्बिनी विकास कोषका कर्मचारीमा नै। 

सबैले जागिर खाने काम मात्र गरेका छन। संस्थाको हीत चिताउने कोही निस्कनसकेन।  नेपाल सरकार र राष्ट्र बैंकको अकर्मण्यताका कारण विभिन्न मुलुकका बौद्धमार्गीहरुले विगत उन्नाइस वर्षदेखि लुम्बिनीमा चढाउँदैआएको करोडौं रुपैयाँ बराबरको रकम कागजको खोस्टासरह भएको छ। लुम्बिनीमा चढाइने विभिन्न मुलुकका पैसामध्ये, विशेष गरी श्रीलंका, बर्मा, कम्बोडिया र भियतनामका बौद्धमार्गीहरुले चढाउँदैआएका ती देशका नोट त्यसै थुपारेर राखिएको र तीमध्ये धेरैजसो सडेर गइसकेको कुरा कोषका कर्मचारीहरु नाम उल्लेख नगरिदिन अनुरोध गर्दै भन्दछन।

ती मुलुकका नोट नेपालमा नचल्ने भएकाले कोषले साट्न नपाएका कारण समस्या परेको बताइन्छ। तर साट्न नपाउनुको अर्थ तीनलाई सुरक्षित तरिकाले राख्नुको साटो बेवास्ता गरेर फ्याँकिदिनु हो र? कदापि होइन। कतै काम नलाग्ने भए पनि लुम्बिनीजस्तो पवित्र स्थानमा चढाइएको त्यो पैसा पवित्र प्रसाद भैसकेको अर्थ निकाल्न नसक्ने नालायकहरुको समूहले लुम्बिनिजस्तो पवित्र स्थानलाई घेरिराख्नु दुर्भाग्यपूर्ण कुरा हो। हुन त यस देशले सौभाग्यको अनुभूति कहिले नै गर्नपाएको छ र! झन् प्रजातन्त्र नामको भजन गाउनपाउने अवस्था सिर्जना भएपछि त भजने, झोलेहरुलाई ठाउँ छोडेर योग्यहरू पाखा लाग्ने बाध्य भएका छन। 

लिम्बिनी विकास कोषले दुइ हजार पचास सालदेखि अशोक स्तम्भमा एउटा र मायादेवी मन्दिरमा दुइटा दान-पात्र राखेको छ जसमा माथि उल्लेखित मुलुकका अतिरिक्त अरू देशका नागरिकले समेत मासिक सरदर तीन लाख नेपाली रुपियाँ बराबरको पैसा चढाउँनगरेको, पर्यटकीय मौसममा त झन महिनाको दस लाख रुपियाँ बराबरसम्मको रकम चढाउनेगरेको बताइन्छ। 

सटही दर नतोकिएका मुलुकका नोट चल्दैन भनेर राष्ट्र बैंकले नसाटिदिने गरेका कारण लुम्बिनीमा चढाइएका श्रीलंका, बर्मा, भियतनाम, कम्बोडियालगायत मुलुकका नोट त्यसै थन्क्याएर राख्नुपर्दा नोटहरु कीराले खाएर वा कुहिएर गइरहेको कुरा लुम्बिनी विकाश कोषका कोषाध्यक्ष ओम अर्याल बताउनुहुन्छ।

सत्तामा रहेका राजनीतिक दलहरु खालि आफ्नो सत्ता टिकाउनमै लागिरहनुपर्ने र सत्ता बाहिर रहेका दलहरुले सत्तामा पुग्नकै लागि कसरत गरिराख्नुपर्ने नेपालको राजनीतिक बाध्यता, र हरेक ठाउँमा योग्य-विशेषज्ञको साटो आफ्नै झोले र चाकरीबाजहरु हुल्नुपर्ने गैह्र-राजनीतिक मानशिकताका कारण यस्ता समस्या सिर्जना भएका हुन। तर पनि कसैमा अलिकति विवेक त हुनैपर्ने होइन र?!  तस्विर सौजन्य: इकान्तिपुर 

तिम्रो मेरो सम्बन्ध - आद्रीयान प्रधान Adrian Pradhan

'कामचलाउ प्रधानमन्त्रीको राजिनामा' - कहीं नभएको जात्रा हाँडीगाउँमा

सामान्यतः टेलिभिजन हेरेर समय बिताउने अवसर मिल्दैनथ्यो। तर आज समय मिल्यो, त्यो पनि माउन्टेन टेलिभिजनको 'गहन विश्लेषण'- (उहाँहरु नेपालीमा यसो नभनिकन डेफ्त न्युस भन्न रुचाउनुहुन्छ) नामक कार्यक्रममा प्राध्यापक डा सुरेन्द्र केसीको प्रखर विश्लेषण सुन्नपाएँ। सारै आनन्दित भएँ। 

तर यस आनन्दमा कता-कता ढुंगा लाग्नपुगेजस्तो भयो त्यति बेला, जति बेला त्यस्तो राम्रो विश्लेषणको बीचमा 'रिपोट'का नाममा समाचार 'विश्लेषण' सुन्न वाध्य पारियो, जसमा स्वर दिने पत्रकार वन्धु 'अध्यक्ष'लाई 'अदछे' भनेर उच्चारण गर्दै हुनुहुन्थ्यो। 'अध्यक्ष' र 'अदछे (क्ष)' बीचको भिन्नता छुट्ट्याउन नसक्ने मानिसलाई यस्तो 'गहन' विश्लेषणात्मक विषय-वस्तु किन पढ्न दियेकोहोला जस्तो लाग्यो। एकै छिनका लागि मन भ्रमित भए पनि डा सुरेन्द्र केसीको सटिक विश्लेषणले मन उतै तानिहाल्यो। 

संविधान सभाको बिघटनदेखि राष्ट्रपति यादवले बाबुराम भट्टराईलाई 'तिमी कामचलाउ भयौ' भनेर जेठ सोह्र गते लेखेको पत्र, 'कामचलाउ प्रधानमन्त्रीको राजिनामा' (कहीं नभएको जात्रा हाँडीगाउँमा) माग्दै समय बिताइरहेको प्रशंग, दलहरुबीच सहमतिका कुरा आदिका बारेमा डा  केसीको विश्लेषण स्पष्ट छ। तर, उहाँलाई सरकारको प्रमुख बनाइदियो भने यी कहिलेइ सहमति गर्न नचाहने, खालि अर्कामाथि दोष मात्र थुपारिराखने राजनीतिक दलहरुलाई सहमतिमा ल्याएर नयाँ निर्वाचन गराउन सक्नुहोला त भन्ने प्रश्नले भने मलाई सताइरह्यो।   

पाकिस्तानको मस्तुंग जिल्लामा शिया तीर्थयात्रीहरु लिएर गैरहेका बसहरुमाथि बम आक्रमण: कम्तिमा सत्रजनाको मृत्यु

पाकिस्तानमा शिया मुसलमान तिर्थयात्रीहरु लिएर गैरहेका बसहरुमाथि गरिएको बम आक्रमणमा परी कम्तिमा सत्रजना मारिएका छन। 

बलुचिस्तान प्रान्तको मस्तुंग जिल्लामा गरिएको सो आक्रमणमा परी घाइते हुनेहरुको संख्या बीसभन्दा बढी रहेको जानकारी स्थानीय अधिकारीहरुलाई उद्धृत गर्दै बिबिसीले जनाएको छ। 

पछिल्ला वर्षहरुमा पाकिस्तानमा साम्प्रदायिक हिंसाका घटनाहरुमा वृद्धी भैरहेको छ। गत महिना मात्र रावलपिन्डीमा गरिएको यस्तै प्रकारको आक्रमणमा परी तेइसजना शिया मुसलमान मारिएका थिए। 

आज गरिएको आक्रमणको जिम्मेवारी अहिलेसम्म कुनै पनि समूहले नलिएको बताइएको छ। 

नक्सा सौजन्य: बिबिसी 

के संघीय समाजवादी पार्टीले जनताका समस्या बुझ्नसक्ला: या फेरि यो पनि सत्ता साझेदारीको हिस्सा मात्र बन्ला?

यो देशमा राजनीतिक दलहरुको ओइरो लाग्ने क्रम अझै जारी छ। राजनीतिक दलगत सिद्धान्त भन्दा पनि व्यक्तिगत सिद्धान्तमा बेमेल देखिनासाथ दुइ/चारजनालाई फुटाएर आफ्नो पक्षमा ल्याई नयाँ दल गठन गर्ने र पार्टी अध्यक्ष बन्ने, परिआएका बेला सत्ता बनाउने र भत्काउने खेलमा सहभागी हुने, त्यसैका माध्यमबाट राजनीतिक फाइदा लिने नेपाली राजनीतिको परम्परा नै बनिसकेको छ। यसै परम्पराको परिणाम हो, नेपालमा शायद संसारका कतिपय मुलुकको तुलनामा सबैभन्दा बढी राजनीतिक दल छन्। 

तर दुर्भाग्य नेपालको र नेपालीको, कुनै पनि राजनीतिक दलले आजसम्म देश र जनताका मुद्दामा नगन्य मात्र आवाज उठाएको छ। कथमकदाचित उठाइहलेछ भने पनि, त्यो आवाज आफ्नो दलगत स्वार्थ पूर्तिसम्म मात्र अस्तित्वमा रहनेगरेको पाइएको छ। हेरौं, अशोक राईको नेतृत्वमा संघीय समाजवादी पार्टी घोषणा भएको एक महिनापछि आज घोषणा गरिएको जन-जाति अगुवाहरुको नेतृत्वमा गठित सामाजिक लोकतान्त्रिक पार्टीले जनतालाई के दिने आँट गर्छ। यो राजनीतिक दल पनि कतै आफ्ना झोलेहरुको पक्षपोषक नै बन्ने हो कि भन्ने कुरामा शंका गर्ने ठाउँ भने प्रशस्तै छ। 

अशोक राईको नेतृत्वमा पार्टी बनाउन एकमत भए पनि सैद्धान्तिक विषयमा कुरा नमिलेको भन्दै अन्तिममा छुटि्टएका चैतन्य सुब्बा, पासाङ शेर्पा, कृष्ण भट्टचन, कुमार राईलगायतका राजनीतिक व्यक्तित्वद्वारा आज राजधानीको चाबहिलमा आयोजित कार्यक्रममा नयाँ पार्टीको घोषणा गरिएको छ। 

सात सदसीय अध्यक्षमण्डल र एकाउन्न सदसीय कार्यसमिति गठन गरिएको यस राजनीतिक दलको अध्यक्षमण्डलमा सुब्बासहित पासाङ शेर्पा, बमकुमारी बुढामगर, कुमार राई, पासाङ शेर्पा, दलमर्दन कार्मी, निमाग्याल्जेन हृयोल्मो र ज्योति दनुबार रहनुभएको छ। सहमतिअनुसार, उहाँहरुले पालैपालो नेतृत्व गर्नुहुनेछ। घुम्दैफिर्दै रुम्जाटार भनेझै कुरा नेतृत्वकै देखिन्छ। तथापि, दलको घोषणा सभामा दिइएको जानकारीअनुसार 'संघीयता, बहुराष्ट्रवाद, आदिवासीवाद र सामाजिक न्याय यस दलको प्रमुख सिद्धान्त हुनेछ । आशा गरौँ, यस दल पनि सत्ता साझेदारीका मुद्दामा मात्रै नअल्झियी थोरै मात्र भए पनि जनताका समस्यामा जोरदार आवाज उठाउनतिर लाग्नेछ। 

नेविसंघभित्र सर्वसत्तावाद लादिएको भन्दै असन्तुष्टि

काठमाडौं, पुस १५ - नेपाल विद्यार्थी संघका नेताहरुले संगठनभित्र सर्वसत्तावाद लादिएको भन्दै महामन्त्री प्रकाशमान सिंहसँग असन्तुष्टि जनाएका छन् ।

घोषित महाधिवेशन नहुने निश्चित हुँदा पनि पार्टीले सहजिकरण नगरेको भन्दै नेविसंघ पूर्वउपाध्यक्ष नैनसिंह महर नेतृत्वको टोलीले सिंहसँग आइतबार बिहान असन्तुष्टि जनाएका हुन् । 'हामी एमाओवादीले सर्वसत्तावाद लादेको भनिरहेका छौं,' महरले भने, 'तर नेविसंघभित्र पार्टीले उल्टै सर्वसत्तावाद लादेको कस्ले देख्ने ?'

कांग्रेसले नेविसंघ महाधिवेशन माघ पहिलो साता गर्ने घोषणा गरे पनि क्याम्पस ईकाई, क्षेत्रीय र जिल्ला अधिवेशनहरु भएका छैनन् । 'क्याम्पस ईकाई अधिवेशन अब सम्भव छैन, सवै क्याम्पसमा जाडो बिदा भएको छ,' महरले भने, 'यो सरासर महाधिवेशन हुन नदिने षड्यन्त्र हो, पार्टीले पहलकदमी लिन सकेन ।'

असन्तुष्ट नेविसंघ नेताहरुले आफूखुशी गठन र विघटन गरेका ईकाई समिति खारेज गर्नुपर्ने माग गरेका छन् । उनीहरुले निर्वाचन समिति बनाउन, महाधिवेशन स्थलको घोषणा गर्न पनि माग गरेका छन् ।

महामन्त्री सिंहले सभापति सुशील कोइरालासँग छलफल गरी नेविसंघको विवाद मिलाउन पार्टीले भूमिका खेल्ने स्पष्ट पारे ।

 साभार: इकान्तिपुर 

नेपाली कांग्रेसका नेता चक्रप्रसाद बाँस्तोलालाई मस्तिष्काघात भएको पुष्टि

नेपाली कांग्रेसका नेता चक्रप्रसाद बाँस्तोलालाई मस्तिष्काघात भएको पुष्टि भएको छ। विराटनगरमा बोल्दाबोल्दै बेहोस भएर ढल्नुभएका बाँस्तोलालाई सिलिगुढीमा उपचार गर्ने क्रममा त्यहाँका चिकित्सकहरुले मस्तिष्काघात भएको जानकारी दिएका हुन। 

बीपी कोइराला स्वास्थ्य विज्ञान प्रतिष्ठान धरानका चिकित्सकहरुले उहाँलाई हृदयघात भएको बताएका थिए ।

उच्च रक्तचापका कारण उहाँलाई मस्तिष्काघात भएको चिकित्सकले बताएका छन। 

युवतीको मृत्युप्रति भारतमा शोक व्यक्त: उनलाई न्याय दिलाउन माग

भारतको राजधानी नयाँ दिल्लीमा नगर बसमै सामूहिक बलात्कार गरिएकी तेइस वर्षीया औषधि विज्ञानकी छात्राको मृत्यु भएपछि राजधानी नयाँ दिल्लीका विभिन्न स्थानमा मानिसहरुले मैन-बत्ती बालेर मौन धारण गरेका छन। 

विशेष उपचारका लागि गत बिहिबार सिंगापुर लगिएकोमा शनिबार उनको मृत्यु भएको घोषणा माउन्ट एलिजाबेथ अस्पतालका कार्यकारी प्रमुख केल्भिन लोले गर्नुभएको थियो। 

ती युवतीको मृत्युप्रति शोक व्यक्त गर्न र उनलाई न्याय दिन माग गर्दै शनिबार  राजधानी दिल्लीका सडकमा हजारौं मानिसहरु भेला भए। 

सोह्र डिसेम्बरको यस घटनाका सन्दर्भमा छजनालाई गिरफ्तार गरिएको छ, र उनीहरु विरुद्ध हत्याको आरोप लगाइएको छ।

 तस्विर सौजन्य: बिबिसी 

रसियाको एउटा यात्रुवाहक बिमान धावन मार्गबाट बाहिर गई दुर्घटनाग्रस्त-कम्तिमा चारजनाको मृत्यु

रसियाको एउटा यात्रुवाहक बिमान धावन मार्गबाट बाहिर गई मुख्य सडकमा दुर्घटनाग्रस्त हुँदा कम्तिमा चारजना मारिएका छन। 

उडान नम्बर आरडब्ल्युजेड9268को तुपलेव-204 बिमान मस्कोको व्नुकव बिमानस्थलमा अवतरण गर्ने क्रममा दुर्घटनाग्रस्त भएको जानकारी रुसी समाचार माध्यमहरुले दिएकाछन। 

त्यस विमानमा रहेका आठदेखि बाह्रजना चालक दलका सदस्यमध्य दुइजना चालक, एकजना उडान इन्जिनीर र एउटी उडान कर्मचारी मारिएका छन भने चारजना नराम्ररी घाइते भएको जानकारी आकस्मिक सेवाका अधिकारीहरुले दिएका छन। 

दुर्घटनाग्रस्त बिमानको पुच्छर र चालक दलका सदस्यहरु बस्ने भाग टुक्रिएको छ भने, तेलको ट्यांकी केही भएको छैन। 

चेक गणतन्त्रबाट फर्केको सो दुर्घटनाको कारण बारे छानबिन गर्न रुसी राष्ट्रपति सेर्गेइ मेदवेजेबले आदेश दिनुभएको छ। 

तस्विर सौजन्य: बिबिसी 

Dhaka Topi Dhalkyo Nabhana....ढाका टोपी ढल्क्यो नभन: खुमन अधिकारी+बिष्णु माझी

राष्ट्रपति रामवरण यादव भारतको पाँच दिने भ्रमण सम्पन्न गरी स्वदेश फिर्ता

राष्ट्रपति रामवरण यादव भारतको पाँच दिने भ्रमण सम्पन्न गरी आज अपरान्ह स्वदेश फर्कनुभयो। 

उप-राष्ट्रपति परमानन्द झा, प्रधानमन्त्री बाबुराम भट्टराईलगायत उच्चपदस्थ सरकारी अधिकारीहरुले त्रिभूवन अन्तर्राष्ट्रिय विमानस्थलमा राष्ट्रपति यादवको स्वागत गर्नुभयो। 

वनारस विश्वविद्यालयले प्रदान गर्नलागेको 'सम्मानका लागि डाक्टर अफ ल' को उपाधि हासिल गरेर दिल्ली पुग्नुभएका राष्ट्रपति यादवले त्यहाँ रहँदा आफ्ना भारतीय समकक्षी प्रणव मुखर्जी, प्रधानमन्त्री मनमोहन सिंह, कांग्रेस आईकी अध्यक्ष सोनिया गान्धी, विपक्षी भारतीय जनता पार्टीका अध्यक्ष नीतिन गड्करीलगायतका नेताहरु तथा वरिष्ठ मन्त्रीहरुसँग भेटवार्ता गर्नुभएको बताइएको छ। तस्विर सौजन्य: इकान्तिपुर 

नेपाली कांग्रेसका नेता चक्रप्रसाद बाँस्तोलालाई हृदयाघात?

बिर्तामोड, पुस १४ - बिराटनगरमा भएको एक कार्यक्रममा बोल्दै गरेका कांग्रेस नेता चक्रप्रसाद बाँस्तोला बेहोस भएपछि उनलाई उपचारको लागि भारतको सिलिगुढी लगिएको छ। 

बेहोस भएपछि बाँस्तोलालाई तत्काल धरानस्थित बीपी कोइराला स्वास्थ्य बिज्ञान प्रतिष्ठान पुर्‍याइएको थियो । त्यहाँका चिकित्सकले बाँस्तोलालाई मुटु र मस्तिष्कमा समस्या देखिएको पुष्टि गरेका थिए । सिलिगुढीका चिकित्सक डा. सिल्दराज ओझाले सञ्चालन गरेको नर्सिङ होममा उपचारका लागि उनलाइ लगिंदै छ ।

'उनलाई काठमाडौं वा अन्यत्रै उपचारको लागि लैजान त्यहाँका चिकित्सकले सुझाव दिएपछि सिलिगुढी लगिएको हो', कांग्रेस महासमिति सदस्य सुदीप शिवाकोटीले बताए ।

काठमाडौंका चिकित्सिकले हेलिकप्टरमा काठमाडौंमा ल्याउनु भन्दा एम्बुलेन्समा भारत लान सुझाव दिएपछि उनलाई त्यता लगिएको शिवाकोटीले बताए ।

साभार: इकान्तिपुर 

भारतको राजधानीको नगर बसमै सामूहिक बलात्कारको शिकार भएकी 'छात्रा'को मृत्यु: सुरक्षा व्यवस्था कडा, विभिन्न स्थानमा प्रहरी तैनाथ

भारतको राजधानी नयाँ दिल्लीमा नगर बसमै सामूहिक बलात्कार गरिएकी तेइस वर्षीया छात्राको मृत्यु भएपछि नगरका विभिन्न स्थानमा प्रहरी तैनाथ गरिनुका साथै शान्त रहन सबैलाई आव्हान गरिएको छ। 

दिल्लीको शेफर्जंग अस्पतालमा तीनवटा शल्यक्रिया गरिएपछि उनलाई विशेष उपचारका लागि गत बिहिबार सिंगापुर लगिएकोमा शनिबार उनको मृत्यु भएको घोषणा माउन्ट एलिजाबेथ अस्पतालका कार्यकारी प्रमुख केल्भिन लोले गर्नुभएको थियो। 

उनी को हुन् भन्ने कुरा थाहा हुन नसकेको भनिएकी 'तेइस वर्षीया विद्यार्थी'को शव आज भारतको राजधानी पुर्याइदै छ। 

उनको मृत्युको खबर पाएको भारतीय प्रहरीले मध्ये दिल्लीको अधिकांश भाग बन्द गर्नुका साथै भूमिगत रेल-मार्गका कतिपय बिसौनीहरु बन्द गरेको छ, र मानिसहरुलाई नगरमा घुम्न ननिस्कन आग्रह गरेको छ। नागका मध्ये भागमा पाँचजनाभन्दा बढी मानिस भेला हुन प्रतिबन्ध लगाइएको छ। तस्विर सौजन्य: बिबिसी 

भारतको राजधानी नयाँ दिल्लीमा नगर बसमै सामूहिक बलात्कारमा परेकी तेइस वर्षीया विद्यार्थीको अस्पतालमा मृत्यु

भारतको राजधानी नयाँ दिल्लीमा नगर बसमै सामूहिक बलात्कार गरिएकी तेइस वर्षीया विद्यार्थीको सिंगापुरको अस्पतालमा उपचारका क्रममा मृत्यु भएको छ। दिल्लीको अस्पतालमा तीनवटा शल्यक्रिया गरिएपछि उनलाई थप उपचारका लागि गत बिहिबार सिंगापुर पुर्याइएको थियो। 

बेलुकि साढे नौ बजे दिल्लीको नगर बसमा चढेका ती छात्रा र उनका पुरुष साथीलाई सरकारद्वारा संचालित नगर बसमै गरिएको यस्तो पाशविक व्यवहारका विरुद्ध दिल्लीका सडकहरुमा भएका हिंसात्मक प्रदर्शनका क्रममा एकजना प्रहरी अधिकृत पनि मारिएका थिए। 

माउन्ट एलिजाबेथ अस्पतालमा भर्ना गर्दानै एकदमै गम्भीर र नाजुक अवस्थामा रहेकी ती छात्राको मृत्यु भएको जानकारी अस्पतालका कार्यकारी प्रमुख केल्भिन लो ले दिनुभयो।  

नर-पशुहरुको सामूहिक बलात्कारका कारण ती युवतीको मृत्यु भएपछि बोल्दै भारतीय प्रधानमन्त्री मा=मनमोहन सिंहले यस घटनाले आफूलाई निकै दुखित बनाएको कुरा बताउनुभएको छ। 

यसै डिसेम्बर सोह्र तारिख बेलुकि भएको त्यस घटनाका आरोपी छजनालाई प्रहरीले गिरफ्तार गरेको छ भने दुइजना प्रहरी अधिकृतलाई निलम्बन गरिएको छ। तस्विर सौजन्य: बिबिसी 

चीनमा जवान छोरा-छोरीहरुले नियमितरुपमा आफ्ना बृद्ध आमा-बाबुहरूलाई हेर्न जानैपर्ने कानून

जन-गणतन्त्र चीनले एउटा यस्तो कानून पारित गरेको छ, जसले छुट्टिएर वा काम विशेषले बाहिर रहेका जवान छोरा-छोरीहरुले नियमितरुपमा आफ्ना बृद्ध आमा-बाबुहरूकहाँ जानैपर्ने स्थिति सिर्जना गरेको छ। छोरा-छोरीहरुले आफ्ना बृद्ध आमा-बाबुहरूकहाँ महिना वा वर्षमा, अथवा हप्तामा कति पटक जानुपर्ने भन्ने कुरा त उल्लेख गरेको छैन, तर आफ्ना बृद्ध आमा-बाबुहरुलाई हेर्न नगएमा कानूनी कारबाही हुने कुरा भने उल्लेख गरेको छ। 

अधिकांश परिपक्व चिनियाँहरुले बुढा-बूढी भैसकेका आफ्ना आमा-बाबुहरूलाई एक्लै छोडिदिने वा बेवास्ता गर्ने गरिरहेको परिप्रेक्षमा यस कानूनले बृद्ध अवस्थाका लागि सहारा मानिएका आफ्ना छोरा-छोरीहरुलाई बृद्ध आमा-बाबुहरूकहाँ फिर्ता ल्याउने आशा गरिएको छ।  

यस महिनाको शुरुमा चिनियाँ सरकारी संचार माध्यमले एउटा समाचार प्रकाशित गरेको थियो जसमा एउटा छोराले नब्बे वर्ष पुगिसकेकी आफ्नी आमालाई दुइ वर्षसम्म सुँगुरको खोरमा बस्न बाध्य पारेको थियो। यस प्रकारका समाचार-प्रतिवेदनहरु, अथवा छोरा-छोरीहरुले आफ्ना बृद्ध आमा-बाबुहरुको सम्पत्ति हडप्नखोजेको, अथवा बृद्ध-बृद्धाहरु थाहै नभयी घरमै परित्यक्त अवस्थामा मरिरहेको जस्ता खबरहरु समाचारपत्रहरुमा आइरहन्छन। 

तिब्र आर्थिक विकासको गतिले चीनमा संयुक्त र ठूलो परिवारको परम्परालाई तहसनहस पारेको छ। प्राप्त तथ्यांकअनुसार, आठमध्ये एकजना चिनियाँ नागरिक साठी वर्षभन्दा बढी उमेरको रहेको, र त़ीमध्ये आधाभन्दा बढीले एक्लै बस्नुपरेको कुरा बिबिसीले जनाएको छ। 

चीनको एक शिशु नीति र नाटकीयरुपमा बढेको चीनको औषत आयुका कारण पनि यो समस्या सिर्जना भएको हो। 

पढेलेखेका छोरा-छोरीहरु काम गर्नका लागि ठूला औद्योगिक केन्द्रहरुतिर जाने र घरमा बाबु-आमा एक्लै पर्ने घटना सामान्य भएको चीनमा बृद्ध-बृद्धाहरुका लागि पर्याप्त संख्यामा सेवा निवृत्त अर्थात रेखदेख गृहहरुको स्थापना गर्नु आवश्यक देखिएको छ।   तस्विर सौजन्य: बिबिसी 

जनताका लागि गर्ने यस्ता सरकारका नीतिगत निर्णयहरुले कुर्चीका लागि मात्र लडिरहने नेपाली नेताहरुलाई केही पाठ सिकाउनसके हुन्थ्यो।

मुटुभित्रको माया - अन्जु पन्त

प्रधानमन्त्री बाबुराम भट्टराईद्वारा माथिल्लो मादी जल-विद्युत आयोजनाको शिल्यानास: विकास योजनाहरुको सुरक्षामा सरकारका तर्फबाट पूर्ण प्रतिवद्धता व्यक्त

प्रधानमन्त्री डा बाबुराम भट्टराईले कास्की जिल्लाको सिल्दुजरे गाविसमा निर्माण गर्नलागिएको माथिल्लो मादी जल-विद्युत आयोजनाको आज शिल्यानास गर्नुभयो। पच्चीस मेगावाट क्षमताको उक्त योजनाको निर्माण चीनको त्रि-घाँटी कम्पनी र नेपाली निजी क्षेत्रको गरी पाँच अर्ब अठ्ठाइस करोडको संयुक्त लगानीमा गर्नलागिएको हो ।   

शिलान्यासपछि कार्यक्रमलाई सम्बोधन गर्दै प्रधानमन्त्री डा भट्टराईले विकास योजनाहरुको सुरक्षामा सरकारका तर्फबाट पूर्ण प्रतिवद्धता व्यक्त गर्दै निर्भिकताका साथ लगानी गर्न लगानीकर्ताहरुलाई आग्रह गर्नुभयो।  

वर्तमान राजनीतिक अवस्थाका बारेमा बोल्दै प्रधानमन्त्री भट्टराईले दलहरुबीच सहमति भए आफू पद छोड्न तयार रहेको कुरा बताउनुभयो। आफू सहमतिको बाधक नभएको कुरा दोहर्याउँदै उहाँले अहिले दलहरुबीच कुर्चीका लागि लडाइँ चलिरहेको छ, त्यस  बाहेक कुनै सहमति भएको छैन भन्नुभयो।  आफू सहमतिको बाधक भएको भनेर लगाइएको आरोप शतप्रतिशत गलत भएको दाबी गर्दै प्रधानमन्त्रीले 'हुँदै नभएको सहमति मैले कसरी भाँडे?' भनेर प्रश्न गर्नुभयो। 

कसैलाई प्रधानमन्त्रीको कुर्चीमा ल्याउनकै लागि कसैले भन्दैमा आफूले राजिनामा नदिने, तर मुलभूत विषयहरुमा समग्रमा राजनीतिक सहमति भएमा भने आफू बाधक नबन्ने कुरा स्पष्ट पार्नुभयो।

सुर्खेत जिल्लाको दशरथपुरमा बस दुर्घटना: पन्ध्रजनाको मृत्यु, सत्र घाइते

सुर्खेत जिल्लाको दशरथपुर नजिकै गमखोलामा आज भएको बस दुर्घटनामा परी मारिनेहरुको संख्या पन्ध्र पुगेकोछ। शुक्रबार बिहान यात्रुबाहक बस दुर्घट्ना हुँदा १५ जनाको निधन भएको छ । 

गुमीबाट सदरमुकाम वीरेन्द्रनगरतर्फ जाँदैगरेको ना.२ ख ५७४१ नम्बरको यात्रुवाहक बस सडकबाट ६० मिटर तल खसेको थियो। सो दुर्घटनामा सत्रजना घाइते भएका जानकारी प्रहरीले दिएकोछ । 

कच्ची बाटो र तिब्र गति दुर्घटनाको कारण हुनसक्ने अनुमान प्रहरीले गरेको छ। 

त्यस दुर्घटनामा मारिने यात्रीको नाम/ठेगाना निम्न बमोजिम छ:

रामबहादुर रानाभाट, चितवन                                                 चन्द्रकला राउत, सुर्खेत

तुकराम विक, दैलेख,                                                             दीपा ढकाल, सुर्खेत

ममता खड्का, सुर्खेत                                                             गजेन्द्र गुरुङ, सुर्खेत

कुमार पौडेल, सुर्खेत                                                         मानबहादुर गाहा, सुर्खेत

केशर सिरिस, सुर्खेत                                                         प्रज्वल श्रीस, सुर्खेत

यमन मिदुन,सुर्खेत                                                           गान्धी सुनार, सुर्खेत

अर्जुन सुनार, सुर्खेत                                                          ललित भण्डारी बस चालक 

बुद्धिकला फौंजा मगर                                                                    

काम गरिखाने मानिसहरुलाई सारै कठिन भएको छ।

यस प्राधिकरणको मनपरीतन्त्रका कारण यसैमा आधारित भएर काम गरिखाने मानिसहरुलाई सारै कठिन भएको छ। 

बुधबार बेलुकि सात बजे आउनुपर्ने विजुली आयो, खुशी भएर काम गर्न बसें। चालिस/पैचालिस मिनेटपछि झ्याप्प निभाइदियो। फेरि चालिस/पैचालिस मिनेटपछि दियो। 

बिहिबार आठ बजे बेलुकि आउनुपर्ने विजुली आयो, अलिकति भए पनि कम गर्नुपर्यो भनेर कम्पुटर खोलें। चालिस/पैचालिस मिनेटपछि फेरि झ्याप्प निभाइदियो। फेरि चालिस/पैचालिस मिनेटपछि दियो। 

अहिले शुक्रबार विहान नौ बजे जानुपर्ने बत्ति पौने आठै बजे निभाइदियो, फेरि पाँच मिनेटपछि दियो। 

किन यसरी बत्ती निभाएको भनी 'नो लाइट' शाखामा फोन गर्दा ट्रीप गएको भनेर सजिलो उत्तर दिन्छन। नेपालको सबैभन्दा बढी राजस्व बुझाउने नेपाल विद्युत प्राधिकरण जस्तो संस्थाले दिनमा कयौं पटक चिप्लिने यस्ता यन्त्रहरु बदल्न किन सक्दैन? या त यो नै यसको 'कमाइखाने भाँडो' हो?

कस्तो ब्यथिति हो यो? मनपरी गर्दैमा ठूलो भइन्छ कि क्या हो?!

नेपाल विद्युत प्राधिकरणको व्यवस्थापन पक्ष कहिले जिम्मेवार बन्ला?

नेपाल विद्युत प्राधिकरणको व्यवस्थापन पक्ष कहिले जिम्मेवार बन्ला? नेपाल सरकारलाई सबैभन्दा बढी राजश्व बुझाउने संस्थामध्येको एक यस संस्थाको व्यवहारदेखि यसका ग्राहकहरु आजित भैसकेका छन। तथापि, नेपालको राजनीतिक संस्कारका कारण यस्ता मानिसहरु एक जुट हुनसकेका छैनन, जसका कारण यसको सम्पूर्णता जोगिएको छ (तथापि भक्तपुरका केही सजग नागरिकले भने कुनै सङ्केत दिइसकेका छन् है)।

यस विद्युत प्राधिकरणले बनाएको भार सम्प्रेषण तालिकाअनुसार मात्र नभई यसले मनपरी विद्युत आपूर्ति गर्ने र काट्ने गर्दा आफ्ना टेलिभिजन, कम्प्युटर जलेर भएको क्षति समेत सहन गर्न नेपाली ग्राहकहरु बाध्य छन। यस देशका भ्रष्ट शासकहरुले एउटा ब्यापारी/साहुको गाडीले मान्छे किचेर मार्दा समेत नगन्य मूल्य चुकाएर मुक्त हुने व्यवस्था गरेका छन, तर सर्बसाधारण नागरिकले आफ्नो 'पेट काटेर' भए पनि सूचना र मनोरंजन हासिल गरौँ भनेर किनेको टेलिभिजन, कम्प्युटर जस्ता उपकरणहरु विद्युत प्राधिकरणको मनपरीतन्त्रका कारण जल्दा त्यसको क्षतिपूर्ति दिनुपर्ने कानून बनाउनआवश्यक ठानेका छैनन। 

यस संस्थाका कर्मचारीहरु आफ्नै संस्थाले बनाएको समय-तालिकाको पालना आफै गर्न सक्दैनन। विजुली मनपरी (पन्ध्र/पन्ध्र, बीसस/बीस मिनेटको अन्तरालमा समेत) निभाउने र बाल्ने गरिरहन्छन जसका कारण कतिले कति आर्थिक र मानसिक क्षति व्यहोर्नुपरेको छ, यिनलाई थाहा छैन, काननूनको अभावमा। 

यस संस्थाको व्यवस्थापन पक्षमा अलिकती पनि व्यावशायिक इमान्दारी छ भने, पंचायत कालको राम्रो पक्षको अनुसरण गरोस, र मानिसहरु सुत्ने बेला (रातभरि) र सूर्यले उज्यालो दिने बेला (दिनभरि) बत्ति निभाएर पंचायत कालमा झैं विहान र बेलुकि (मानिसहरुलाई विजुली सबैभन्दा बढी चाहिने बेला) विजुली देओस। त्यति पनि गर्ने क्षमता छैन भने, कम्तिमा आफूले बनाएको भार सम्प्रेषण त;तालिकामा अडिग रहोस। हामी त्यसैमा बानी पर्दैछौं। 

Yeti Dherai chot... Raju Lama

अफ्रीका के चाहन्छ, त्यो अफ्रिकिहरु मात्र जान्दछन

अफ्रिकाले अब आफ्नै गोलार्धमा ढाँचा तयार पारिएका मोबाइल सेटहरू प्रयोग गर्न पाउनेभएको छ। 

कोंगोका उद्यमी वेरोन मनकोउले ढाँचा तयार पर्नुभएको स्मार्ट फोन र ट्याब्लेट नाम दिइएका ती दुइवटा मोबाइल सेटहरूको निर्माण चीनमा गरिनेभएको छ। 

उद्यमी वेरोन मनकोउको कम्पनी भीएमकेका यी  मोबाइल सेटहरूलाई गुगलको अन्द्रोइड सफ्टवेरले चलाउँछ। 

स्मार्ट फोनको मूल्य एक सय सत्तरी डलर र ट्याब्लेटको मूल्य तीन सय डलर राखिएको छ। 

त्यस स्मार्ट फोन र ट्याब्लेटका   ढाँचा तयारकर्ता  वेरोन मनकोउ दक्षिण अफ्रिकाको जोहनेसबर्गमा आयोजित टेक फर अफ्रीका सम्मेलनमा भन्नुहुन्छ: अफ्रीका के चाहन्छ, त्यो अफ्रिकिहरु मात्र जान्न सक्छन। 

यापल अमेरिकामा ठूलो छ, सामसुङ्ग एसियामा, अनि भीएमके अफ्रिकामा (हुनेछ)।  तस्विर सौजन्य: बिबिसी 

सामाजिक सुधारमा यसले सकारात्मक प्रभाव पारोस

अबैध कार्य भएको हुनसक्ने, वा भएको भनेर, नेपाल सरकारले गाडीहरुमा कालो शीसा राख्न, वा सेतो शीसामा रंग पोतेर भित्र नदेखिने बनाउन नपाइने जस्ता कतिपय निर्णयहरु गरेको थियो। तर त्यो निर्णय कहिलेइ कार्यान्वयन भएको देखिएन। अहिले पनि यस्ता गाडीहरु यदाकदा काठमाडौँका बाटाहरुमागुडिरहेका देखिन्छन। 

यस्तै एक प्रकारको निर्णय अहिले, ठ्याक्कै भन्नुपर्दा, अस्ति बुधबार भक्तपुरको जगातीदेखि साँगासम्मका होटल व्यवसायीहरुको संस्था-  अरनिको पर्यटक व्यवसायी संघ र प्रहरीबीच भएको बैठकमा गरिएको छ। बैठकमा अरनिको राजमार्ग दायाँ-बायाँ खुलेका होटल/रेष्टुरेन्टको कोठामा भित्रबाट चुकुल लगाएर बस्न नपाइने नियम बनाइएको छ। होटल र रेष्टुरेन्टमा हुने अनैतिक कार्य रोक्न प्रहरी र होटल व्यवसायीबीच भएको यस बैठकमा गरिएको भनिएको बाह्र बुदे सहमति कति कार्यान्वयन हुने हो, त्यो त समयले नै देखाउला।

नेपालमा हालसम्म, खासगरी प्रजातन्त्रको पुनर्स्थापनापछि, गरिएका निर्णयहरु, बनाइएका-लागू गरिएका कानूनहरु प्रायजसो अलपत्र परेका देखिन्छन, विशेषतः यदि तिनीहरु ठूलावडा र पहुँचवाला अनि ब्यबसयीहरुका क्रियाकलापमा अंकुश लगाउनेखालका छन् भने। त्यसैले यो सहमति/निर्णय पनि प्रभावकारी रुपमा लागू होला भन्ने कुरामा स्थानीय बासिन्दाहरु नै विश्वस्त देखिदैनन किनकि यसमा 'अनैतिक कार्य गरेमा कानुनी कार्यबाही' गर्ने भन्ने जस्तो कुरा कतै उल्लेख छैन। 

तथापि, होटेल व्यवसायलाई मर्यादिप बनाउने नाममा भक्तपुर प्रहरीले हावादारी निर्णय गरेको भन्नेजस्ता टिप्पणी अहिलेइ हुनथालिसकेको सन्दर्भमा प्रहरीले सजग भएर प्रभावकारी रुपमा कार्य गर्न पनि सक्छ। तर जे होस्, शुरुवात भने राम्रै भएको मान्नुपर्छ- होटलमा कार्यरत महिला कर्मचारीलाई  खाना पकाउने, ग्राहकहरुको सेवा गर्ने लगायतका काममा लगाउन नपाइने, महिलालाई होटल तथा रेष्टरेन्टमा अनैतिक कार्यमा लगाएमा, बोलाएर अनैतिक कार्य गराएमा होटल व्यवसायीको सदस्यता स्वत खारेज हुने, होटल तथा रेष्टुरेन्टमा काम गर्ने महिला कामदारलाई भद्र पोशाकमा मात्र काममा लगाउनुपर्ने जस्ता निर्णय पनि भएको छ, जसलाई सराहनीय नै मान्नुपर्छ। आशा गरौँ, यसले राम्रै परिणाम ल्याउला।   

मान्छे ठूलो भएर के गर्ने, मानसिकतामा परिवर्तन नआएपछि?

मानिसले आफ्नो हेसियत के हो भन्ने भन्ने कुरा  थाहा थाहा पाउन नसक्दा राष्ट्रपति रामबरण यादवको जस्तै हालत हुन्छ। उहाँले आफू नेपालको राष्ट्रपति भएको कुरा बिर्सनुभयो, र सम्झिनुभयो आफूलाई नेपाली कांग्रेसको सदस्य मात्र। त्यसैले उहाँ भारतीय प्रधानमन्त्री मनमोहन सिंहको निबास पुग्नुभयो, उहाँसङ्ग 'शिष्टाचार' भेट गर्न। 

नेपालका प्रधानमन्त्रीलाई शितल निवास बोलाउने राष्ट्रपति यादवले भारतीय प्रधानमन्त्रीलाई, शायद, आफूभन्दा ठूलो देख्नुभयो। त्यसैले पुग्नुभयो, मनमोहन संघको निवासमा। 

नेपालको राष्ट्रपति भएको पाँचौं वर्षसम्म पनि उहाँले नेपाली कांग्रेसको सदस्यभन्दा एक रती पनि माथिको आफूलाई सम्झनुभएको रहेनछ। मान्छे ठूलो भएर के गर्ने, मानसिकतामा परिवर्तन नआएपछि? नेपाली नेताहरुको मानसिक स्तर बुझेरै होला, शायद, टाइम्स अफ इन्डियाले पनि नेपाली राष्ट्रपतिले भारतीय प्रधानमन्त्रीलाई भेटेको समाचारलाई कतै स्थान दिएको छैन, बरु भारतीय राष्ट्रपतिका छोरा एवम जंगिपुरबाट कांग्रेसका सांसद अभिजित मुखर्जीले सामूहिक बलात्कारका सम्बन्धमा दिनुभएको अभिव्यक्तिका कारण सिर्जित अवस्था र उहाँले माफी माग्नुभएको समाचार प्रकाशित गरेकोछ।

प्राप्त समाचारमा जनाइएअनुसार, राष्ट्रपति यादवले पहिले भारतीय प्रधानमन्त्रीसङ्ग औपचारिक वार्ता गर्नुभयो, त्यसपछि भारतीय प्रधानमन्त्रीद्वारा उहाँको सम्मानमा आयोजित रात्रिभोजमा सरिक हुनुभयो। राष्ट्रपतिका सूचना सल्लाहकार राजेन्द्र दाहालले जानकारी दिनुभएअनुसार, राष्ट्रपति यादव र भारतीय प्रधानमन्त्री बीचको वार्ता स्थलको निर्णय आफ्नो सुविधानुसर गर्न भारतीय अधिकारीहरुलाई अनुमति दियिएको थियो।   

राष्ट्रपति यादवको भ्रमण दलमा सहभागी अन्य सदस्यहरुले यस विषयलाई आफूहरुले 'गम्भीर रुपमा नलिएको' बताए पनि यो विषय प्रतिष्ठाको हो।  कुरा जेसुकै भए पनि, यदि यो घटना सही हो भने, यसले नेपाललाई होच्याउने बाहेक अर्को कुनै राम्रो काम नगरेजस्तो लाग्छ! 

तस्विर सौजन्य: नेपालन्युज.कम

मन्त्रिपरिषदको आजको बैठकद्वारा विभिन्न निर्णयहरु

मन्त्रिपरिषदको आज बसेको बैठकले विभिन्न निर्णयहरु गरेको छ। बैठकले नेपाल टेलिभिजनको अध्यक्षमा सिताराम अग्रवाललाई नियुक्ति गरेको छ भने  गरिबी निवारण कोषका उपाध्यक्ष जनकराज जोशीको राजनीनामा स्विकृत गरेको छ । 

मन्त्रिपरिषदको आजेको बैठकले प्रधान सेनापती गौरवशमशेर राणाको यही पुस बाइसदेखि माघ दुइ गतेसम्म हुनलागेको भारत भ्रमणलाई स्वीकृति प्रदान गरेको छ । 

बैठकले नेपाल-भारत पारवाहन सन्धि नविकरणका लागि वाणिज्य तथा आपूर्ति मन्त्रालयका सचिव लालमणि जोशीलाई अख्तियारी दिने निर्णय गरेको छ।

त्यसैगरी,  बैठकले गाउँ विकास समितिका सचिवलाई मासिक एक हजार पाँच सय रुपियाँ अतिरिक्त भत्ता दिने निर्णय पनि गरेको छ। 

त्यस्तै, विदेशबाट फर्किंदै गर्दा त्रिभवन अन्तर्राष्ट्रिय विमानस्थलमा अध्यागमनका कर्मचारी र प्रहरीबाट लुटिएकी महिलालाई तत्काल एक लाख पचास हजार रुपियाँ राहत प्रदान गर्ने निर्णय पनि मन्त्रिपरिषद्को बैठकले गरेको छ।

इजिप्टका राष्ट्रपति मोहम्मद मोर्सिद्वारा इजिप्टको नयाँ संविधानमा सही

इजिप्टले दुइ वर्ष नपुग्दै नयाँ संविधान बनाएर जारी गरेको सुन्दा कता कता चसक्क हुन्छ, हामी नेपालीहरुको अकर्मण्यता देखेर। हाम्रा नेपाली राजनीतिक दलका नेताहरुले चार-चार वर्षसम्म झगडा गर्दै, तर थप्दै खाँदै गरे, अझसम्म पनि कुर्ची-मोह र निषेधको राजनीतिका नाममा लाज पचाएर अझै लुट्ने प्रपन्च रच्दैछन, देश र जनताका सारा पींडाको बेवास्ता गर्दै। 

इजिप्टका राष्ट्रपति मोहम्मद मोर्सिले हिजो इजिप्टका जनताद्वारा बनाइएको संविधानमा सही गरेर त्यो संविधान तत्कालदेखि लागू भएको घोषणा गर्नुभयो। इजिप्टको नयाँ संविधानका सन्दर्भमा गराइएको जनमत संग्रहमा संविधानका पक्षमा करिब त्रिसट्ठी प्रतिसत मत परेको थियो। तथापि प्रतिपक्षिहरुले त्यो संविधान निकै इस्लामिक भएको भन्दै त्यसको विरोध गरेको सन्दर्भमा श्री मोर्सिले उनीहरुलाई वार्ताका लागि आह्वान गर्नुभएको छ। 

राष्ट्रपति होस्नी मुबारकको शासन विरुद्ध आन्दोलन शुरु भएदेखिको अवधिलाई गणना गर्दा पनि दुइ वर्ष नपुग्दै तयार गरेर  लागू गरिएको इजिप्टको नयाँ संविधानको खबरले नेपाली राजनीतिक दलका नेताहरुलाई पनि सत्बुद्धी देवस। यही मेरो कामना र आशा छ।

तस्विर सौजन्य: बिबिसी   

दक्षिण अफ्रिकी भूतपूर्व राष्ट्रपति नेल्सन मण्डेला स्वास्थ्य सुधारपछि घर फिर्ता

दक्षिण अफ्रिकाका भूतपूर्व राष्ट्रपति नेल्सन मण्डेलाको स्वास्थ्यमा सुधार भएपछि चिकित्सकहरुले उहाँलाई घर पठाएका छन। 

श्री मण्डेलाको स्वास्थ्यमा पूर्ण सुधार नहोउञ्जेल उहाँलाई जोहानेसबर्गस्थित उहाँकै घरमा उपचार गरिने जानकारी दक्षिण अफ्रिकाली राष्ट्रपति जाकोब जुमाले दिनुभएको छ। 

चौरानब्बे वर्षीय मण्डेला अठाह्र दिनअघि अस्पताल भर्ना हुनुभएको थियो। उहाँलाई फोक्सोमा भएको संक्रमण र मृगौलाको पत्थरीको उपचार गरिएको थियो।

तस्विर सौजन्य: बिबिसी   

अमेरिकाका भूतपूर्व राष्ट्रपति जर्ज एच डव्ल्यु बुश सघन उपचार कक्षमा

ब्रोङ्काइटिसको उपचारका लागि गत नभेम्वर तेइस तारिखमा अस्पताल भर्ना गरिनुभएका अमेरिकाका भूतपूर्व राष्ट्रपति जर्ज एच डव्ल्यु बुशको स्वास्थ्यमा सुधारमा संकेतहरु नदेखिएपछि उहाँलाई सघन उपचार कक्षमा राखिएको छ। 

यसो भए तापनि उहाँले आफ्ना परिवारका सदस्य तथा चिकित्सकहरुसङ्ग कुराकानी गर्न सक्ने अवस्थामा रहेको जानकारी बुशका प्रवक्ता जीम मक्ग्राथले बताउनुभएको बिबिसीले जनाएको छ। 

अठासी वर्षीय बुश अमेरिकाका सबैभन्दा बढी उमेरका जीवित राष्ट्रपति र दोश्रो युद्धमा सहभागी योद्धा हुनुहुन्छ। 

श्री बुश भूतपूर्व राष्ट्रपति रोनाल्ड रेगनको राष्ट्रपतित्व कालमा दुइ पटक उप-राष्ट्रपति बन्नुभएको थियो, र सन् उन्नाइस सय उनानब्बेमा अमेरिकाको एकचालीसौं राष्ट्रपति बन्नुभएको थियो। तर सन् उन्नाइस सय बयानब्बेमा दोश्रो अवधिका लागि उम्मेदवार बनेपछि भने उहाँलाई प्रजातान्त्रिक पार्टीका उम्मेदवार बिल क्लिन्टनले पराजित गर्नुभएको थियो। 

तस्विर सौजन्य: बिबिसी